(AP) — Sostenedornan buscando liberacion di ex-prome minister Pakistani, Imran Khan a kibra door di un ring di container blokeando e capital ayera, y a bataya contra forsanan di seguridad a pesar di un menasa di gobierno pa responde cu tiramento. Seis persona a muri den e violencia.
Miles di forsa di seguridad a inunda centro di Islamabad den un intento pa stop protesta den sosten di Khan cu a atrapa e capital y areanan rond desde diadomingo. E politico popular ta den prison pa mas cu un aña y ta enfrenta mas di 150 cargo criminal cu su partido ta bisa tin motivacion politico.
Autoridadnan ta bisa cu solamente corte por duna orden pa liberacion di Khan, kende a haya retiro na 2022 mediante un voto di desconfiansa den Parlamento. E ta den prison desde su prome condena den un caso di corupcion na augustus 2023.
Ayera, ehercito Pakistani a tuma control di D-Chowk, un plaza grandi den Zona Cora downtown di Islamabad, cu ta sede di edificionan clave di gobierno y unda presidente Belaruso, Alexander Lukashenko ta kedando di bishita. Rangernan paramilitar y polis tambe a sali y algun a los tiro di advertencia na laira.
Asina mes, esposa di Khan, Bushra Bibi, kende ta liderando e protesta, a haci progreso slow den direccion di e plaza den un convoy cu guardia pisa, rondona pa simpatisantenan.
Minister di Interior, Moshin Naqvi a menasa cu forsanan di seguridad lo responde cu tiramento di manifestantenan tira riba nan. “Awo nos a permiti polis tuma cualkier decision segun e situacion,” Naqvi a bisa despues.
Polis a usa gas lagrimogeno den un intento pa dispersa e multitud. E fayecidonan ta inclui cuatro miembro di servicio di seguridad y un civil, mata ora un vehiculo a trapa riba nan riba un caya den marduga. Prome minister Shehbaz Sharif a denuncia e atake, bisando cu un “grupo anarkista” tabata atacando deliberadamente personal di seguridad. No tabatin toma di responsabilidad pa e trapamento. Un agente di polis a muri den un incidente separa.
