Un ola di protesta contra cambio climatico a extende rond henter mundo, cu miles di hoben mandando un mensahe na lider di Nacionnan Uni: Mundo no por warda pa accion.
E marchanan, rally y manifestacion a tuma luga for di Canberra te Kabul y ciudad di Copenhagen, unda ta spera pa sigui mas marcha. E ‘Welga di Clima Global’ tabata consisti di reunion di como dos dozijn di activista na Seoul cu luz LED mandando mensahenan den codigo Morse pa pidi accion pa salba Tera, y demostracionnan na Australia cual organisadonan ta calcula tabata e protestanan mas grandi na e pais desde cu Guera di Irak a cuminsa na 2003.
E protestanan a wordo inspira pa activismo di e hoben Greta Thunberg, kende a organisa manifestacion semanal pa hala atencion di lider mundial pa intensifica esfuerso contra cambio climatico.
Thunberg a bisa AP cu e eventonan ta un gran victoria. Ta spera cu Thunberg lo participa na e Cumbre di Clima Hubenil di ONU, y papia na e cumbre di accion climatico cu lidernan mundial dialuna.
Mundo henter a bira 1 grado Celsius mas cayente desde prome cu era industrial, y cientificonan ta atribui mas di 90% di e keintamento na actividad industrial humano.
Cientificonan ta adverti cu e keintamento global lo trece mas ola di calor, mas secura, tormenta poderoso, inundacion y otro problema cu ya caba a cuminsa manifesta.
Centenares di manifestacion a tuma luga rond di Europa, incluyendo Republica Checo, Inglatera y Polonia. Na Berlin, polis a bisa cu mas di 100.000 persona a reuni na e capital dilanti Brandenburg Gate, cerca di unda gabinete di canciyer Merkel a logra e detayenan final di un plan pa baha emision di gas invernanero na Alemania.
