Trahadonan di Selikor ayera mainta a pone trabou abou pa bay den protesta contra medidanan tuma pa e compania pa retira empleadonan y stop di duna cierto servicio.

Serlikor ta pasando den problema financiero pasobra gobierno no ta suplementa nan presupuesto. Algun trahado di Isla tambe a uni e protesta. E protesta a cuminsa mainta cu un marcha di varios centenar di recogedo di sushi, kende ta rabia pasobra lo corta 12.5% di nan beneficio. E reduccion aki pa ambtenaar y empleado di companianan estatal ta parti di e condicionnan cu Hulanda a pone pa duna prestamo pa absorbe e consecuencianan di crisis di coronavirus.

E sindicato mas grandi di Corsou, ABVO, cu ta representa ambtenaar, a tene un reunion durante ora di trabou pa discuti esaki. Na e reunion aki, empleadonan di compania estatal y ministerionan a vota den gran mayoria contra e recorte.

E trahadonan tabata na post vijf y exigi pa prome minister, Eugene Rhuggenaath presenta. Na momento cu e no a presenta, nan a move den direccion di Forti. E trahadonan ta bisa cu no lo bay di Forti te cu nan papia cu Rhuggenaath. Nan kier pa gobierno di Rhuggenaath renuncia y pa tene eleccion nobo.

Mientras tanto, riotpolis a retira tur persona di fortiplein, usando gas lagrimogeno riba e manifestantenan dilanti di Fort Amsterdam, unda gobierno ta basa. Polis anteriormente a ser manda pa preveni cu manifestantenan drenta oficina di prome minister. Polis a logra pusha e multitud den centro. Despues a resulta un confrontacion na Plaza Nobo. Aki a bolter un auto di polis y a cende esaki na candela.

Mientras tanto, districtonan Punda y Otrobanda na Willemstad lo keda cera te diabierna mainta. Prome minister Rhuggenaath y minister di Husticia, Quincy Girigorie a anuncia esaki durante un conferencia di prensa extraordinario. E conferencia di prensa a tuma luga como respuesta na e disturbio di orden publico despues di e manifestacion. Despues di esaki, a tuma luga destruccion, hortamento y kimamento den centro. Ademas, a tira boter y piedra, y a kibra bentana di tienda y baki sushi.

Rhuggenaath a bisa di ta den ‘shock’ pa e disturbio. “Nos mester haci un sacrificio pa bay dilanti, esaki ta medida di Hulanda. Nos tur mester haci e ahustenan aki. Nos ta buscando solucion pa bay dilanti y mantene paz pa tur persona. Destruccion y agresion no ta yuda cu esaki. Esaki lo destrui centro y nos bunita isla.”

Girigorie a reporta cu seis persona a ser aresta te ceramento di edicion ayera nochi, pero a indica cu mas persona por keda aresta. El a bisa cu derecho di protesta ta algo completamente diferente cu disturbio di orden publico. Esaki tin consecuencia, Girigorie a bisa. “Nos ta bay busca e personanan responsabel.”
Anteriormente a reporta cu hefe di polis Sambo a renuncia pa motibo di e situacion.

Girigorie tambe a anuncia cu tin un toque de queda (curfew) general for di 8:30pm te 6am.