Diabierna atardi Vivian Krozendijk a bay Parlamento y Oficina di Gobernacion pa haci entrega di carta di manifestacion. E carta aki ta dirigi na minister encarga cu salud Alex Schwengle, pa mehora cuido medico aki na Aruba. E caso specifico cu Sra. Krozendijk ta a bin den contacto recientemente cun’e y principalmente ta. Manifestando pe ta esun di e hoben na estado cu morocho cu a fayece den hospital hunto cu un pia di morocho. E otro baby cu a keda na bida, ainda ta den hospital.
Segun Sra. Krozendijk ainda no a tende nada for di Hospital riba causa di morto di e hoben. Su abogado a tuma contacto cu Departamento di Salud Publico pero no a haya mas informacion, nan a keda di yama nan bek. Autopsia no a wordo haci ainda y cadavernan ta keto bay na Aurora. Teniendo na cuenta cu otro siman tin dianan liber atrobe, si no tende nada, ta cuminsa cu caso sumario, segun Sra. Krozendijk.
E carta cu Sra. Krozendijk a entrega tin varios motibo cu kier mehoracion y algun peticion cual e grupo kier pa haya atencion titula: “no mas tristesa pa negligencia pa cu nos salud”. Considerando cu cuido medico na Aruba ta laga hopi di desea, e problemanan ta varia di cuido y trato pa esunnan cu mester brinda e cuido, dokter y enfermeronan. Remedi ekiboca, of cu no ta efectivo, virus na hospital, tardansa den haya cita cu specialista, tardansa den ricibi resultado di testnan manera ta e caso di pap test, instrumentonan medico cu ta daña, casonan urgente cu no ta wordo atendi debidamente na Eerste Hulp y e pashent ta wordo manda cas sin cu salud ta permiti esey.
Cu e cuido medico deficiente y/o negligencia medico a causa casonan cu consecuencia fatal den cierto casonan, y den otro casonan cu consecuencia di daño serio na salud di pashentnan. Cu e forma con ta trata cu casonan di negligencia medico actualmente no ta satisfactorio, y den hopi caso e victimanan no ta tende nada mas pa hopi tempo. Tambe e carta ta menciona cu e maneho di AZV pa manda hende afo no ta funcionando. Cu Aruba mester tin un vision pa miho calidad di cuido pa nos salud. Cu cada ciudadano di pais Aruba ta paga pa cuido di salud y pues merece un miho calidad di cuido medico y merece un hospital cu ta sigura bida di e ser humano na prome luga y no e pago di AZV prome luga. Cu e bida di nos ser keri ta bal hopi y placa no por trece nan bek pa ta cu nos.
Esakinan ta e motibonan cu ta haci entrega di e manifiesto, den cual e grupo di manifestantenan aki a uni y demostra nan preocupacion, dolor, desesperacion y grito pa miho cuido medico. Y bisa awe cu mehoracion y calidad di cuido di nos salud ta prioridad den nos comunidad.
E grupo ta acerca gobierno cu e siguiente peticionnan:
Pa bin un cambio den leynan entre otro relaciona cu “Medisch Tuchtcollege” riba termino corto pa tene dokternan, specialistanan y hospital responsabel pa tur gastonan y daño causa pa nan negligencia medico y pa haci e procedura di keho pa cuidadonan mas simpel. Pa ekipa Inspector si Salubridad cu suficiente hende y material pa por controla y garantisa un cuido di salud digno. Pa percura cu Hospital di Aruba bira atrobe un hospital higienico y apto pa trata cu bida di e ser humano y elimina e bacteria nan. Pa elimina e tempo di espera demasiado largo pa pashentnan por: yega na specialista, haci testnan na hospital pa motibo di instrumentnan daña, haci testnan di laboratorio entre otro pap test. Tambe pa revisa e ley di AZV y traha riba un plan pa AZV baha su gastonan, stop di uza air ambulance pa hiba personanan infecta cu bacteria Colombia, y laga solamente pashentnan grave bay den exterior pa tratamento. Pa haci tur posibel pa evita cu tin mas caso di negligencia medico cu consecuencia fatal y pa garantisa un miho cuido di salud. Por ultimo, pa atende cu e preocupacionnan y peticionnan inclui den e manifiesto aki riba termino corto den gobierno di Aruba.
