Ayera den oranan di atardi, Aruba por a mira con e ciudadanonan a sali riba caya pa mustra nan mal contento den diferente protesta y na diferente caminda. Specialmente un cu a causa sentimentonan uni como emocion y tristeza na momento cu den palabranan di e mesun manifestante a pidi pa ‘Husticia’.

Grupo End Child Abuse ‘Ta Basta’ a congrega centenares di persona dilanti corte. Algun victima a papia tocante loke nan a sinti ora nan a pasa den e situacion di abuso sexual y con nan a keda ‘marca pa semper’, manera un di nan a bisa.

E grupo di manifestantenan a yega porta di Parlamento, na unda varios parlamentario y presidente di Parlamento, Ady Thijsen a sali pa ricibi e manifestantenan cu tabata grita “Nos kier mira cambio, no pasa nada”.

Famia di Rishandroh y Eugene Anastacia, dos mucha chikito cu a muri na 2017 pa via di abuso y maltrato, tambe tabata presente y a ofrece un palabra pa pidi husticia. Nan a comenta cu ‘no ta husto cu e mama di e muchanan chikito aki, cu a muri, ta cana liber manera nada no a pasa’.

Danny Marquez, miembro di e grupo, a expresa pa Bon Dia Aruba cu den tur e situacion aki e ta sinti hopi rabia y hopi emocion. Door di loke ta pasando el a ripara cu hopi hende a scucha e yamado pa bin y lanta nan voz, pa lucha den e mesun causa. “Aruba a bin, Aruba a bisa ta basta, nos kier y nos ta exigi un cambio.”

Despues nan a bay Bersturskantoor unda e propio minister presidente Evelyn Wever-Croes, hunto cu minister di Husticia Andin Bikker y minister di Labor y Asunto Social, Glenbert Croes a ricibi nan y duna algun declaracion. Nan a priminti un contesta pa loke ta trata e 12.000 firma cu e manifestantenan a entrega, como tambe un carta y e puntonan cu nan ta pidi pa gobierno adapta.

Di esaki, Marquez a menciona cu asina ta spera cu miembronan di e grupo por sinta hunto cu nan pa dialoga y trece dilanti nan preocupacion pa haya un solucion, pa procesonan mehora.

Tambe el a declara cu dialuna awor pa 5or di atardi nan tambe lo entrega e firmanan pa gobernador.

Di su parti, Yuri Bracho ken tambe tabata un di e lider di e protesta aki a duna danki na pueblo cu a uni pa e mesun causa, cu ta pa detene e abuso sexual di muchanan. El a mustra hopi conmovi y emociona pa motibo cu e mes a sigura, ‘ami a haci’e pa pueblo y pa muchanan, pa nan por kibra e silencio, p’esey nos t’ey’.

Asina mes, el a confirma cu e ta dispuesto pa sali di aki pa 90 dia, pa motibo cu ‘esaki ta un inicio y no ta bay caba, si no, nos lo subi caya back’.