E tabata un potret cu a yama hopi atencion. Un capitan di un boto, Anthony Hagedoorn a pasa dilanti Embasssy Suites y a nota con e matanan di mangel ta secando. El a pon’e riba su Facebook pa hala atencion. Mesora otro ambientalistanan a dicidi pa haci pregunta, y Presidente di Aruba Birdlife Conservation a hasta bay saca potret mas cerca.
E pregunta tabata si e matanan ta malo pa ki motibo y si e proyecto di hotel, cu ta un mega hotel unda hasta mester a haci cambionan infrastructural enorme pa facilita acceso na beach por a causa e salud di e mangelnan. E matanan aki ta proteha y pa ley, no ta permiti pa kita nan.
E miedo cu ambientalistanan tin ta cu deliberadamente a haci daño na e mangelnan aki pa asina por traha luga pa un beach mas amplio pa e hotel.
Bon Dia Aruba a tuma contacto cu DOW riba e asunto. Director Marlon Croes a bisa di a tuma nota di e situacion y a manda su personal bay haci e control necesario. Croes no kier saca ningun conclusion y ta kere cu expertonan mester determina si e mangelnan ta afecta pa motibonan di trabounan infrastructural of pa motibo di ciclonan natural. Tambe DOW a tuma contacto cu Direccion di Naturalesa y Medio ambiente, DNM, pa por manda expertonan pa haci e analisis.
Bon Dia Aruba a tuma contacto cu DNM, pero te ayera tardi no tin un conclusion cu por comparti. Lo keda pendiente pa analisis.
Pa ambientalistanan, e imagen ta trece memoria di kico a pasa den e saliña na Santo Largo, con e mangelnan na Savaneta a cuminza seca y finalmente a muri. E tempo ey a ripara cu no tabatin suficiente fluho di awa pa e saliña y esaki tabata pasobra di construccion di e camindanan di asistencia pa e Green Corridor. Awor kier accion mesora pa evita cu e mangelnan dilanti di e hotel, cu ainda ta den construccion sigui e mesun destino cu esnan na Savaneta.
