Algun luna atras Bon Dia Aruba a publica con presidente di organisacion ambiental Aruba Birdlife Conservation (ABC) a bati alarma pa e situacion di e mangelnan na Santo Largo. Ayera atrobe Greg Peterson a post riba su pagina di Facebook algun imagen unda cu por mira cantidad di mangel completamente seco/secando. Sr. Peterson no ta e unico cu a señala esaki, ya cu pa algun tempo caba habitantenan den e area mes trece esaki dilanti.

Riba medionan social nos por a lesa por ehempel un persona cu ta bisa cu for di ora cu nan a cuminsa drecha e caminda di Santo Largo, e mangelnan a cuminsa muri y “ningun hende ni instancia no a saca un man pa por haci algo of por ta awo atrobe DOW lo bolbe manda un notificacion di despensa. Cu tabata un fout den planificacion y no a pasa tubo bao di e caminda pa asina e awa por a circula y tene e mangelnan bibo.”

Esaki tabata locual organisacion ABC a trece dilanti algun tempo atras cu e awa di lama no ta yega e mangelnan. Pa motibo di trabaonan di infrastructura den e area aki ultimo tempo. E organisacion a haci un yamada pa departamentonan di DOW, DIP y Medio Ambiente pa soluciona e problema y evita cu e area completo di mangel wordo destrui. Aworaki por mira riba imagennan nobo cu e mangelnan a keda bay atras. “Ken ta responsabel? Ken lo mester responsabilisa su mes pa e crimen horibel aki contra naturalesa di Aruba?Tin algo cu ta wordo haci pa stop e destruccion y purba di salba locual ta bibo ainda?”, tabata comentarionan di sr. Greg Peterson riba su pagina di Facebook ayera.

Suministro di awa
Donny Rasmijn di partido AVP a comenta tambe riba Facebook cu e bario tin basta decada puntrando pa yudansa cu problema di sangura den e area. Esaki tabata causa pa motibo di awa stagna den e saliña. “Pa via di esaki, mi a presenta un mocion den parlamento na 2013, cual a wordo accepta unanimamente. Aworaki algun cos a pasa despues.”

Sr. Rasmijn a sigui comenta cu un contractor a coba un ‘trench’ anto instala un kabel electrico nobo banda di e pipanan existente di WEB. Despues a bini un awasero grandi cu a inunda e area incluyendo e saliña. Ora cu e contractor a cuminsa ‘refurbish’ e caminda, segun Rasmijn a sigui comenta, el a pensa cu esaki tabata un bon oportunidad pa soluciona e suministracion di awa. DOW a dicidi di haci e trabao pero a haya sa cu e contractor cu a coba e trench a destrui e pipanan cu ta conecta e saliña cu e lama. Cu hopi esfuerso y atraso den proyecto, nan a elimina e pipa destrui anto instala un nobo segun Rasmijn a sigui splica den su comentario.

Esaki el a recorda cu a causa hopi stagnacion den trafico tempo cu tabata trahando riba dje. Sr. Rasmijn ta bisa, “Sin embargo e pipa parti west no a keda restaura. No ta segura si circulacion/suministracion di awa lo keda estableci si e pipa ta restora. Mi opinion, un bon canal di ‘inlet & outlet’ mester wordo traha pa yuda cu e problema aki. Anto e saliña mester wordo haci limpi di tur material putri cu e ta contene, cual tambe ta destrui e mangelnan, pisca y otro populacion.”

Bon Dia Aruba lo busca un reaccion for di departamentonan concerni, a pesar cu Departamento di Medio Ambiente ya caba a laga sa cu nan ta prohibi di papia cu prensa. Nos redaccion lo sigui e desaroyonan aki di cerca pa mira kico ta e maneho y ken ta en berdad encarga pa cuida nos mangelnan.