Despues cu Bon Dia Aruba a publica dia 4 di mei riba rednan social cu trabaonan di RWA na Palm Beach no tabata avansa y DOW no a contesta preguntanan di redactor tocante kico ta sucediendo cu e proyecto aki, DOW a publica diaranson ultimo 17 di mei riba su pagina di Facebook cu “e trabaonan a encontra contratiempo.”

“E departamento a informa cu e trabaonan infrastructural planea pa mehora drenahe di awa na Palm Beach, specificamente dilanti di Citgo Palm Beach, a cumisa dia 27 di maart 2023 y tabata planea pa tin un duracion di 30 dia di trabao. Durante construccion a encontra retraso dos biaha, unda cu e prome retraso a surgi ora a coba e sleuf pa instala e tuberia nobo y a encontra kabel y tuberianan imprevisto cu a resulta den daño nan cu mester a drecha”.

E comunicado ta indica cu durante e proceso aki tambe a ahusta e diseño pa evita e kabel y tuberianan imprevisto. A resolve esaki unda cu e contratista mester a reanuda trabao dia 19 di april 2023 pa por finalisa pa 16 mei 2023.

Recien e proyecto a bolbe encontra un retraso pa di dos biaha. Den e caso aki, e contratista principal ta afecta door di su mesun otro proyectonan den ehecucion pa cual a resulta den problemanan temporal di logistica y financiero.

Esaki a resulta cu trabaonan a para e ultimo 3 simannan y no tabata tin personal y ekipo di e contratista pa continua cu e trabaonan. Mientras tanto e problema di e contratista cu a encontra a keda resolvi y e siman aki trabaonan a reanuda na Palm Beach.

E planificacion a wordo ahusta pa cual e contratista tin cu cumpli cune y no ta descarta cu lo aplica multa pa e contratista encarga.

Mas informacion tocante e planificacion ta bay wordo avisa den transcurso di siman. Ta importante pa menciona cu comerciantenan rond di e area ta esnan cu mas ta afecta debi na e trabaonan aki. Nan ta esnan cu a acerca Bon Dia Aruba pa asina ey puntra DOW kico tabata pasando cu e trabaonan aki no tabata avansa. Trahadonan y mashinnan tampoco tabata haciendo nan trabao. Bon Dia Aruba a purba di informa comunidad, pero DOW no a duna un contesta te dia 17 di mei unda nan a publica e comunicado aki riba Facebook.