Minister di Enseñansa, Ciencia y Desaroyo Sostenibel, Rudy Lampe ta spera cu riba e fecha di 4 di juni, kiermen aki un luna, tur hoben y mucha sa exactamente ken a slaag y kende no.
Igualmente e mandatario a laga sa cu pais Aruba a haya un bon noticia for di su colega, Ingrid van Engelshoven kende ta minister di Enseñansa, Cultura y Ciencia di Hulanda. E mandatario Hulandes a responde positivamente na e peticion cu gobierno di Aruba a haci. Esta di considera cu nos diplomanan ta igual cu e diploma di Hulanda.
Minister Lampe a considera e echo aki importante, pasobra aworaki nos schoolexamen ta bay ta determinante pa e alumno por haya su diploma, ya cu no tin centraaleindexamen. “Tabata importante pa Hulanda reconoce cu nos diploma a base di schoolexamen ta igual cu esun di Hulanda.”
El a sigura cu nos studiantenan cu ta haya un diploma na final di e aña academico aki (2019-20) nan por keda trankil. Nan por sigui studia na Hulanda y universidadnan, y otro institucion di educacion superior cu ta respeta nos diploma.
El a bisa cu nan lo concentra riba nos candidatonan pa examen final pa evita cu niun hoben sali perhudica. Tambe nan a bin cu e maneho nobo cu tur muchanan y mayornan por ta trankil cu niun ta bay sali perhudica debi cu e ultimo simannan e lesnan no a bay manera normal.
Nan ta bay stimula pa tur mucha ta pasa over pa siguiente aña. Sinembargo a base di e prome dos rapport, nan ta bay remedia y sigur e mayornan tambe lo haya conseho riba cual scol nobo bo yiu mester bay, ya sea MAVO, EPB of HAVO. Tur esaki pa bienestar di e mucha.
Tur scol -segun e mandatario- ya ta na altura di loke ta schoolexamennan pa asina nan por cumpli cu e reglanan di departamento di Salubridad Publico pa loke ta e distanciamento social y medidanan di higiena of bio siguridad debi na e Covid-19.
El probecha pa desea tur nos studiantenan y maestronan hopi exito, durante e etapa final di e aña escolar hopi singular aki.
