Ayera atardi, mediante un conferencia di prensa minister encarga cu Transporte Publico, Ursell Arends a informa cu prome cu fin di aña ta bay publica un maneho nobo pa transporte publico cu tambe ta bay atende cu e lista di prijs pa taxi.

Taxi tin un tarifa estableci pa tur di nan cumpli cune y asina tin e “competencia husto,” unda un no ta cobra mas cu otro. Na mesa di redaccion di Bon Dia Aruba a yega informacion indicando cu taxistanan no ta cumpliendo cu e lista di prijs aki pa motibo cu segun a informa, e no ta vast den e ley.

Redactor di Bon Dia Aruba a tuma contacto cu minister Arends, ken den conferencia di prensa tambe a contesta e mesun pregunta aki na otro medio, indicando cu tabatin un lista di prijs estableci na 2018 te cu 2022, pa loke ta trata maneho nobo di transporte publico y nan ta bay atende cu e lista di prijs tambe.

El a menciona tambe cu nan a sinta cu e representantenan di federacion di taxistanan, unda tin diferente central di taxista, y den ultimo reunion e minister a pidi nan pa reorganisa nan mes den un solo organo cu ta representa nan tur, debi cu tin un total di 465 taxista y asina un persona so por representa nan.

Igualmente, Bon Dia Aruba a puntra kico su ministerio ta haciendo pa loke ta trata taxinan pirata cu ta afecta e operacionnan di taxistanan. Minister Arends a contesta: “Nos ta atendiendo esaki empoderando DTP cu inspectornan adicional pa asina aki e controlnan debido por tuma luga y poco poco esnan cu no ta cumpli cu regla of ley, nos lo atende cu esey tambe.”

Ademas, el a informa cu for di aña pasa, nan a limita e cantidad di permiso pa taxi cu tabatin otorga, cu ta 465. Pa loke ta trata e maneho cu tabatin in place, nan trek esey y nan ta bay atene nan mes na loke ley ta prescribi. “Na e momentonan aki, cu estudio cu nos a haci, unabes nos lo publica e maneho nobo nos lo premira pa aumenta e cantidad di vergunning mirando e cantidad di hotelnan cu ta bin. Pero prome cu nos haci esaki disponibel, nos lo discuti esey cu tur stakeholders pa tuma e decision y pakico por hustifica pa haci esey disponibel.”

E reclamo cu nan ta haya for di turista, manera el a sigura, ta cu hopi biaha e vergunninghouder ta verhuur nan vergunning pa otro hulpchauffeur haci uso di esaki. E hulpchauffeur ta traha pa paga e vergunninghouder, pero tambe pa genera ganashi pa nan mes. “Akinan ta caminda unda tambe nos tin cu wak con por atende cu esaki, pasobra tin ora cu nos ta wak riba tur pagina social cu number di taxi ta comete infraccion of ta cobra un turista di mas y e ta crea un mal imagen pa Aruba, pero mi ta kere ta falta di conocemento, mirando cu nan mes no ta e vergunninghouder y esey ta duna un mal imagen.”

Minister di Transporte a splica tocante e proceso di digitalisacion di e proceso pa pidi permiso, indicando cu for di momento cu el a keda encarga cu e cartera aki el a enfrenta varios reto, principalmente e proceso pa pidi permiso tanto pa taxi cu numberplaat T y O, segun el a informa.

E maneho nobo cu nan ta premira cu ta bay keda publica prome cu fin di aña pa loke ta trata transporte publico tin cinco punto pa stimula mobilidad, cu ta lo siguiente:

Calidad y Honestidad den e sistema: Esakinan ta procesonan conforme ley personenvervoer cu ta bay contribui na un comunidad husto. “Pa añanan politiconan a custuma di desvia pa loke ta trata e ley creando inhusticia y ta depende di un politico pa yega na un vergunning,” e mandatario a sigura. Cu e digitalisacion esey no ta bay tuma luga.

Sostenibel y Duradero den bon relacion cu Medio Ambiente: Esaki ta impacto di mobilisacion riba medio ambiente y con practicanan mas sostenibel por ser integra.

Pagabel: E aspectonan financiero di mobilidad y con nan por garantisa cu opcionnan di transporte accesibel y pagabel pa tur hende.

Accesibilidad: Ta e solucion di mobilidad accesibel pa tur sector di poblacion manera mucha, adulto mayor y publico en general pero tambe turistanan cu ta depende di transporte publico. Den esaki minister Arends a comenta cu esaki ta pa reorganisa e rutanan pa asina ta mas eficiente y ta cuadra cu e necesidad y demanda for di comunidad.

Seguridad: Nan lo garantisa e seguridad di tur usuario den tur sistema di mobilidad, incluyendo e chauffeurnan di bus tambe.

Pa loke ta trata e digitalisacion mes, Departamento di Transporte Publico (DTP) hunto cu Bureau Interne Diensten (BID) ta trahado pa digitalisa e procesonan pa asina brinda na esnan cu ta desea di pidi permiso pa por haya mas claridad den e proceso di nan peticion. Por ehemplo, esnan cu kier busca status di nan peticion haci na DTP.

E prome paso ta e lansamento di e formulario digital pa esnan cu a haci peticion pa permiso di taxi den pasado, pa por confirma nan interes actual. E meta ta pa centralisa e peticionnan pa DTP pa asina yuda trece mas structura y claridad den e proceso di peticion di permiso.

E formulario aki ta bay ta disponibel for di 1 di december 2023 te cu 1 di februari 2024 riba e website www.bid.aw cen e parti di peticion digital y despues por yega na formulario pa ciudadanonan. Pa por traha un cita of haya mas informacion di con pa yena e formulario tambe por yama na e number di telefon 583-4114.

“Mi ta ripiti cu e formulario aki ta specialmente pa esnan cu ya caba a entrega un peticion pa permiso di taxi den pasado, mirando cu esaki ta e permiso mas pidi y nos kier atende cu esaki na prome instante,” minister Arends a señala.

Por medio di e formularionan aki ta bay traha un lista di tur e peticion pendiente a base di e fechanan cronologico, den transcurso di e siguiente lunanan nan lo sigui traha pa digitalisa e procesonan di DTP.