Maneho nobo pa transporte publico: Minister di Transporte ta elimina posibilidad pa traspaso di permiso di taxi

Minister di Transporte, Integridad, Naturalesa y Asuntonan di Adulto Mayor, Ursell Arends, a informa ayera e maneho nobo di transporte publico cu lo drenta na vigor dia 1 di september di e aña aki. E cambionan aki ta inclui eliminacion di monopolio di traspaso di permiso di taxi y e cantidad maximo di asiento den un vehiculo di taxi.

Mediante un comunicado minister Arends a splica cu actualmente tin un maximo di 465 permiso pa otorga, di cual practicamente tur ta otorga caba y algun ta pendiente pa nan prolongacion.

Taxistanan por a haci peticion na minister di transporte pa traspasa un permiso di taxi na un miembro di famia, pero den pasado esaki no tabata e caso ya cu traspasonan tabata ser realisa pa personanan cu no ta miembro di famia.

Esaki a crea un tipo di “monopolio” di permisonan di taxi na unda cu hopi di e permisonan cu ya ta limita, no ta yega bek cerca Gobierno pa otorga na otro ciudadano cu a haci peticion pa un permiso. E permisonan ta keda den famianan of ta bay na un persona di escogencia di un taxista, y den cierto caso e permisonan tabata ser bendi ilegalmente.

Na september 2022 minister Arends a revoca e maneho di ex-minister Romero, y a introduci un maneho mas estricto pa traspaso di permiso di taxi pa miembronan di famia. Aworaki e mandatario ta introduci un maneho nobo y asina ta elimina completamente e posibilidad pa traspaso di permisonan di taxi.

E documento di e maneho nobo ta indica cu segun articulo 15 di e “Landsverordening personenvervoer,” e minister por traspasa un permiso na nomber di un miembro di e famia di e persona cu tin e permiso di taxi riba peticion di titular di permiso y bao di cierto circunstancia.

Articulo 15 ta indica tambe cu a base di un decision ministerial, un cantidad maximo di permiso ta determina segun e base di necesidad, causando cu e permisonan por ser considera como limita.

E investigacion “Public Transportation Demand and Supply — Delivering Service? A White Paper on Public Transportation in Aruba” realisa pa e Faculty of Hospitality and Tourism Management Studies na Universidad di Aruba den colaboracion cu e College of Hospitality, Retail & Sports Management na Universidad di South Carolina (november 2022), a revela cu algun titular di permiso di taxi a indica cu nan ta kere cu nan tin e derecho di bende nan permiso.

Den e mesun investigacion a sali na cla cu e traspaso di permiso na “hulpchauffeurs” (chauffeurnan ayudante) ta ser mira como un “loophole” (simulacion) pa bende permiso.

Na 2019, e hues provisional di Corte di Prome Instancia na Aruba a considera den un caso cu e traspasonan di permiso ta bay contra e articulo 15 di e “Landsverordening personenvervoer.” Esaki a resulta cu den practica defacto un “sistema cera” a surgi, caminda e titularnan di permiso ta determina ken ta eligible pa un permiso via traspaso di esaki.

Esaki, segun consideracion di corte, no ta haci husticia na e principio cu cada ciudadano mester tin oportunidad igual pa ser eligi pa un permiso di taxi a base di e “Landsverordening personenvervoer”.

Articulo 15 di e “Landsverordening personenvervoer” no ta duna ningun derecho na e titular di permiso, si no cu e ta un poder discrecional di e minister.

Pa promove oportunidad igual pa ciudadanonan por ser eligi pa un permiso y pa preveni e posibilidad y benta di permiso via traspaso, e posibilidad di esaki mester ser elimina.

Considerando e articulonan 3 y 15 di e “Landsverordening personenvervoer” minister Arends a dicidi cu, den anticipacion y sperando un ahuste di e “Landsverordening personenvervoer,” peticionnan pa traspasonan basa riba articulo 15 no lo ser permiti mas entrante 1 di september.

E regulacion di e minister pa peticion pa traspasonan menciona den articulo 15 di e “Landsverordening personenvervoer,” di 26 september 2022, lo ser retira entrante dia 1 di september 2024.

Peticionnan pa traspasonan di permiso haci prome cu 1 di september 2024 lo ser trata conforme e regulacion di 26 di september 2022 cu ta vigente te 31 di augustus 2024.

Apart di e cambio di maneho pa elimina traspaso di permisonan di taxi, minister Arends a emiti tambe un decision ministerial tocante e cantidad maximo di asiento den vehiculonan di taxi.

Conforme articulo 1, introduccion y parti D y E di e “Landsverordening personenvervoer,” un taxi por ta ekipa pa transporta no mas cu cinco persona, sin inclui e chauffeur. Esaki ta nifica cu e vehiculo di motor di un titular di permiso di taxi por tin maximo seis asiento.

Tin e necesidad pa taxistanan transporta mas cu cinco persona, vooral si ta trata gruponan grandi di turista kier tuma mesun taxi hunto.

Teniendo na cuenta esaki, minister Arends tin intencion pa ahusta e “Landsverordening personenvervoer” pa aumenta e cantidad di asientonan permiti y cantidad di personanan transporta di cinco pa shete, sin inclui e chauffeur.

A pesar di e ley, actualmente tin titularnan di permiso di taxi cu tin vehiculonan cu mas di shete asiento, sin conta esun di e chauffeur. Gobierno no a haci un mantenemento structural y efectivo di e cantidad di asientonan den taxi y e intencion cu e cambio nobo aki ta pa implementa un mantenemento structural y efectivo di e cantidad maximo di asiento permiti den taxi. Alabes gobierno ta desea establece principionan pa e consecuencia si actua contra e decision aki.

Considerando e articulonan 1, introduccion y parti D y E, y 26 di e “Landsverordening personenvervoer” minister di Transporte a dicidi ta permiti pa vehiculonan di titularnan di permiso di taxi y “hulpchauffeurs” por ta ekipa pa no mas cu shete asiento, sin conta e asiento di chauffeur, y cu un chauffeur por transporta no mas cu shete persona den e vehiculo.

Titularnan di permiso di taxi y “hulpchauffeurs” cu un vehiculo cu tin mas cu shete asiento, sin conta esun di e chauffeur, lo tin te 30 september 2024 pa adapta nan vehiculo pa no mas cu shete asiento, sin inclui esun di e chauffeur.

Departamento Transporte Publico ta bay ta encarga cu e control di cumplimento di e cambionan aki. Den caso cu no cumpli loke ta prescribi den e decision ministerial aki prome cu 1 di october, cual ta e fecha di entrada di e maneho nobo aki, ta cu e permiso lo ser revoca temporalmente pa 30 dia.

Si un titular di permiso di taxi ser sorprendi un di dos biaha cu un vehiculo di taxi ekipa cu mas di shete asiento, sin conta esun di e chauffeur, e permiso lo ser revoca temporalmente pa un periodo di nobenta dia. Y si e titular di e permiso di taxi ser sorprendi un di tres biaha pa e mesun cos, e permiso lo ser revoca permanente.

Si durante un control encontra cu un vehiculo di taxi ekipa cu mas di shete asiento, sin conta esun di e chauffeur, y tin pasaheronan den e vehiculo, e chauffeur ta haya e oportunidad pa hiba e pasaheronan na nan destinacion.