Na un conferencia di prensa teni conhuntamente entre director di DOW Marlon Croes y minister di Infrastructura Otmar Oduber ayera mainta na Havenstraat, a declara cu lo tin cambio di maneho tumando luga pa kita peso riba trafico y comercio ora proyecto ta wordo ehecuta of ora di mantencion. E maneho nobo lo hacie posibel pa trabounan tuma luga den oranan di anochi.
Mandatario di infrastructura sr. Oduber a splica cu despues di a sinta hunto cu DOW nan a bin na un conclusion pa ehecuta mas cu ta posibel proyectonan den area comercial manera caya grandi den parti anochi. Esaki segun e mandatario tambe ta algo cu ta pasando internacionalmente.
“Restauracionnan cu tambe mester tuma luga lo wordo haci den oranan di anochi of madruga. Mi ta kere e ta un condicion mas fresco pe trahado y e ta un ambiente mas faborabel”. Leynan laboral tambe ta duna espacio amplio pa esaki por tuma luga segun e mandatario.
Havenstraat lo ta cla awe
Na banda di e beneficio pa e trahado e mandatario ta spera cu esaki lo alivia trafico ora mantencion ta wordo haci rond di nos isla. “Awe ta Black Friday pues esaki tambe ta un dia importante pa comercio”. Pues e trabou cu ta wordo haci na Havenstraat pa reemplasa e klinkers e mandatario a priminti cu lo wordo caba prome cu awe mainta den oranan di anochi of madruga.
Mas leu ainda di e trabou na Havenstraat, e mandatario a splica cu despues di e conferencia di prensa lo bay reuni hunto cu sr. Croes pa asina bin na un manera pa alivia trafico den henter area di centro di ciudad. Entre otro ideanan lo wordo discuti manera con pa restringi crusamento di peaton riba caya solamente pa cierto area manera cu e ta na aeropuerto. Segun sr. Croes tabatin un rioolering cu a sufri daño na Havenstraat cual a causa e hundimento di e klinkers na Havenstraat.
Riba e parti di trabounan haci parti anochi sr. Croes a declara cu esaki ta un posibilidad tanto pa contratista priva como empleadonan di DOW. “Nos tin algun experiencia cu trabounan den anochi caba pero nos tin di bay mehor’e”. Pa trahadonan di DOW esaki kiermen cu trahadonan cu lo traha durante anochi no lo traha durante dia, pues ta trata di un cambio di shift. Sr. Oduber di su banda a expresa cu lo wak e posibilidad pa duna trahadonan cu ta haci proyecto den anochi por haya un tipo di compensacion pa esaki.
“Pasobra aunke bo tin cu paga algo esaki ta wordo neglisha pa laga e caya aki habri y no trapa riba e 30 tiendanan cu tin akinan den centro di ciudad. Esaki ta beneficia tanto nos economia como contribucion pa caha di gobierno. Pa scapa un parti di e placa ey di traha anochi ta perhudica ambos cos”.
Sinembargo ainda mester haci analisis riba esaki. Pero e mandatario a expresa cu e mentalidad lo tin di cambia pa por facilita un miho maneho.
