Maneho nobo di otorgamento pa permiso di hotel ta hala hopi atencion

Minister Dangui Oduber ayera a anuncia cu a introduci un maneho nobo di otorgamento pa permiso di hotel den cuadro di turismo sostenibel. Segun e minister, e maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construi.

Den un comunicado di prensa, Minister Oduber a indica cu e maneho ta enfoca riba calidad y no cantidad; enfoca riba turismo sostenibel; reduccion di camber cu nunca no a wordo construi; y cu olamente boutique hotels lo haya permiso.

“Na Aruba hopi ta sinti cu dia pa dia e isla ta birando mas chikito y no tin espacio pa mas desaroyo hotelero,” segun e comunicado. “E sentimento bao di localnan ta uno di preocupacion cu sigur Gobierno Wever-Croes tin e responsabilidad pa atende cune.”

Referiendo na e permiso otorga den gobernacion anterior pa construi mas di 7mil camber, Oduber a bisa cu esaki “no ta cuadra cu un desaroyo balansa y sostenible.”
“Dunando permiso na tanto camber asina ta trece hopi problema cune y ta algo di condena.”

Ademas, E comunicado ta destaca un cantidad di reto cu Gabinete Wever-Croes actual ta enfrentando, manera escasez di trahador, cu ta nifica cu Aruba mester di inmigrantenan di exterior pa yena e cuponan. E inmigracion aki tambe tin su reto, ya cu no tin suficiente vivienda pa nos localnan, no tin suficiente scol pa nos muchanan, y infrastructura di nos isla no ta diseña pa tin tanto auto riba caminda, segun e comunicado.

For di esfera politico, e anuncio di minister di Turismo a ricibi hopi atencion. Ex-parlamentario Daphne Lejuez tambe a comenta riba e anuncio di minister di Turismo. Riba rednan social, el a comenta riba e hecho cu e maneho nobo ainda ta laga espacio pa mas construccion di camber di hotel. “E maneho nobo di turismo ta laga espacio pa mas proyecto of expansion di condo/apartments, boutique hotel y Airbnb bao di 100 camber. Plus e minister su maneho ta laga espacio semper pa e por desvia di su maneho,” Lejuez a menciona.

Den un publicacion riba su cuenta di Facebook riba diamars, Lejuez a expresa su preocupacion pa cu e maneho nobo presenta pa minister Oduber. Particularmente, ta duna atencion na e hecho cu e maneho nobo ta keda sin impone ningun limitacion riba construccion di acomodacion cu menos di 100 camber, manera Airbnb, apartamento, condominio of boutique hotel – algo cu e minister mes a indica den su comunicado.

“Awe a ser anuncia un maneho nobo pa cu permiso pa mas camber di HOTEL – pero manera semper ta laga espacio pa e minister tin e “discretionaire bevoegdheid” pa wijk af. Tambe e ta valido unicamente pa projectonan di 100 camber di HOTEL of mas, dus, projecto te cu 99 camber no ta cai bao di e maneho aki manera condo, apartment of airbnb.

“Mester corda cu den e ROPv ta papia bon cla cu prome cu 2025 lo traha maximo 1,971 kamber di HOTEL y despues di 2025 lo bin mas camber di HOTEL aserca (1,357 kamber) – aki no ta papia ainda di condo’s/apartments/airbnb!!

“Dus no ta tene na e maximo di 2,000 manera originalmente acorda, pero 3,328, dus surpasa esaki cu un total di 1,328 camber di HOTEL (dus sin conta condo’s/apartments/airbnb)

“PLUS: e maximo aki por wordo re-evalua na 2025 – dus e lo por bira mas cu e 1,328 cu tin pendiente despues di 2025 … Esey ta e base pa e maneho??”

Di su banda, parlamentario di Accion21, Miguel Mansur a comenta cu “na 2018 Aruba Tourism Authority a haci un estudio riba carrying capacity, riba tur 19 indicador Aruba tabata riba capacidad of riba e condicion ideal. Kico Minister Dangui Croes a haci, sconde e rapport y sigui gaba cu cantidad record di bishitante.”

“Awor den su maneho nobo e mandatario ta declara cu lo duna permiso unicamente pa boutique hotels sin stipula un maneho pa con defini un boutique hotel,” Mansur a continua. “Normalmente boutique hotel tin menos cu 100 camber, pero nos ta compronde cu Port City ta inclui dos hotel di 200 camber. Si tur 19 indicador di nos carrying capacity ta indica cu nos a sobrepasa nos capacidad of e condicion optimal, esey kiermen cu NO tin luga pa mas bishitante, no ta porta ki tipo di hotel nan ta keda aden.”

Mansur a bin cu algun sugerencia pa un maneho, comentando: “Luga di controla permiso pa proyectonan di hotel nobo, mester limita e cantidad di bishitante cu ta yega Aruba. Limita e cantidad di bishitante lo nifica cu esnan cu tin permiso di hotel y permiso di construccion ta menos probabel pa construi mirando cu nos no ta permiti mas bishitante. Aruba lo ta ricibiendo un record 1.240.000 stay-over bishitante, a bira tempo pa establece un plafond y dicidi cu no ta permiti mas cu esey mientras ta completa un estudio ta cuanto ta e nivel optimal.

“Limita e cantidad di bishitante y laga e hotelnan y vacation rentals competi cu otro a base di calidad ta e solucion cu nos pais mester adopta. Asina ta menos probabel cu gobierno lo wordo hiba corte pa esnan cu ya caba tin permiso pa construi un hotel nobo pasobra e limite di bishitante ta cambia e return cu nan lo por haya riba nan inversion. Mester reintroduci incentivo pa hotelnan renoba y cu un limite riba cantidad di bishitante nan tin mas incentivo pa upgrade nan producto pa inclui mas suites por ehempel.

“No ta tur turista ta mescos, tin cu ta gasta $850,- pa dia y otronan cu ta gasta $250,- pa dia. E diferencia di loke nan ta aporta ta enorme, un maneho structural pa converti mas di nos bishitantenan pa esnan di luho cu ta gasta $850,- pa dia ta keda falta.”

Ademas, el a referi na e famoso slogan “No more hotels” cu a bira popular entre comunidad local.

“‘No more hotels’ mester traduci den un plafond den bishitante, mester limita e cantidad. A bira ora pa duna contenido na ‘low-impact high value’ y impone un cantidad maximo di bishitante cu nos por ricibi pa aña.”

Usuarionan di rednan social tambe a expresa nan preocupacion. “Locual mester ta vivienda bon y na bon prijs pa nos Arubianonan trahador. No por ta asina cu 2 of mas yiu cu extra nan yiu y partner tin di biba cerca nan mayornan. Tin cas di famia cu tin como 12+ bibando hunto. Traha flat pa Arubiano por huur of cumpra,” un di nan a comenta.

“No ta poco laat? Stop di papia di otro gobierno y focus riba futuro,” otro a comenta riba e pagina di e minister. “E estilo nobo lo bira diferente “boutique” hotel bao UN dak? Dus e mesun cantidad di camber toch?” otro usuario a indica, y un otro mas a agrega: “wega di palabra. Just pone un stop, cla.”