Maneho nobo di husticia lo ta preventivo bou sistema ‘veiligheidshuis’

Minister Arthur Dowers a declara na Bon Dia Aruba cu e weso di lomba di su man di maneho nobo riba tereno di husticia  ta e cooperacion cu mester tin cu tur e departamentonan pa asina garantisa e desaroyo sano di e sociedad.

El a splica cu e plataforma aki ta consisti di un sistema cu na Hulanda ta wordo yama ‘veiligheidshuis’, caminda bo ta trece tur e partnernan den  husticia. E maneho aki -cu ya caba el a anuncia pa un periodo nobo 2017/20 dependiendo di e resultado di eleccion venidero di dia 22 di september proximo-  ta cuadra cu e pensamento di e e criminoloog, esta Simone van der Zee kende a participa di un presentacion cu a tuma luga na Surfside Marina diaranson anochi.

Minister Dowers a afirma cu e cooperacion aki ta un di e puntonan cardinal di su maneho nobo. Tambe e lo tin pensa di bin cu un presentacion tocante e plataforma  di siguridad. “Nos a draai e caba den un forma piloto caminda cu tur esunnan cu ta traha ariba  tereno social y di prevencion di desaroyo di mucha. Prevencion di maltrato, prevencion di crimen cu bo ta haya polis y Ministerio Publico, Sociale Zaken, Directie Voogdijraad, Reclassering.”

Segun e plan di e mandatario e instancianan aki ta forma parti di e plataforma di siguridad. P’esey den e presentacion aki varios representante di e instancianan aki tabata presente, ademas di e gremio comercial. E instancianan menciona ariba ta bin hunto pa atende di un forma individual e muchanan cu ta core risico di cay den crimen of cu a cay den crimen caba. E ta haya cu asina aki tur instancia ta bay ta hunto locual ta facilita e trabou; y tambe nan por tene otro responsabel tambe pa con e resultado, ya cu nan no perde facil un hende for di bista.

E ta convenci cu e forma di traha aki ta bay duna  nan e posibilidad na termino largo di reduci of realoca e medionan cu nos tin pa yega cerca mas hende y haya mas miho resultado.

Plataforma di husticia
E ta kere cu e consciencia aworaki ta cerca tur hende di por traha hunto. Aunke e mandatario ta kere cu e prome yama no ta husticia pa preveni cu e muchanan ta desaroya nan mes den forma malo; pero e resultado finalmente ta bin cerca husticia. P’esey el ta haya cu no solamente na Aruba sino den  otro pais cu husticia a tuma e responsabilidad di percura pa tur hende bini hunto y traha den bienestar di e comunidad.

E plataforma aki no solamente ta yuda pa atende e menor pa preveni cu nan no cay den criminalidad, pero tambe nan a atende adictonan, personanan cu a comete crimen cu tin un impacto grandi pa ehempel atraco.

Den e mesun plataforma aki nan por atende hendenan cu a cay den crimen pero cu bo kier percura pa den un forma hopi lihe -sin cu necesariamente nan mester ta dilanti di hues- tin un intervencion cu por tuma luga. El a cita un ehempel den caso di un hoben cu a comete un delito e por wordo atendi den nos centro ortopedagogico enbes di warda te ora cu e hoben ta cana tur e trayectoria di yega na prizon prome. Pues e ta  kere cu e plataforma aki ta brinda diferente posibilidad pa atende y preveni delincuencia cerca nos poblacion mas jong si bo ta implementa e forma di traha aki. “Mi tin  tur confiansa cu e ta bay funciona. Ya cu el a funciona den e fase piloto.”