Minister di Husticia y Integracion Andin Bikker (POR) conhuntamente cu directornan di Dimas y Iasa a anuncia cu lo bin cambionan den maneho di Dimas cu lo afecta ambos departamento. Pa prome lo pasa peticion pa prolongacion di estadia turistico pa Iasa. E otro cambio ta encera cu ora cierto aplicante ta sperando contesta riba su prome peticion di estadia na Aruba lo por warda e contesta riba e isla.

Manera nos a publica siman pasa tabatin discusionnan andando pa algun tempo entre departamentonan Dimas y Iasa pa asina pasa over e parti di prolongacion di estadia turistico pa Iasa. Den nos entrevista cu director di Dimas Kathy Ruiz Paskel siman pasa e director a duna di conoce e traspaso lo por bira realidad pa via di e proceso di screening cu Iasa tin na su luga caba pa por tramita e peticionnan aki. Alabes pa percura menos incosistencia den e data cu ta existi entre e dos departamentonan.

E problema pa trata e peticionnan a surgi despues cu Dimas a instala nan sistema nobo Sirsa cual nos a reporta extensamente riba dje siman pasa. E sistema nobo a trece cu ne retonan inespera pa e departamento. A determina cu e aplicacionnan cu no a wordo trata lo keda aproba desde ayera. A tene consideracion cu e personanan aki cu a pidi pa prolonga nan estadia turistico pasobra ‘nan no por a anticipa cu lo tin problema cu sistema nobo di Sirsa y nos no por bay bisa cu nos no ta aproba si nan a cana nan caminda manera prescribi’.

Cierto grupo lo tin mag di warda pa prome permiso na Aruba

Pa loke ta trata e cambio cu lo permiti personanan cu a aplica pa un permiso pa prome biaha por warda e contesta di Dimas riba nan peticion na Aruba sra. Ruiz Paskel ta elabora riba con nan a bin na e decision aki. Apart di e cambionan cu a wordo anuncia, den futuro lo evalua e maneho y haci cambionan adicional tambe. Segun e directora, ‘nos a sinta pa wak cua ta e personanan cu no ta crea un peso pa nos isla ora di warda pa nan prome permiso pero si ta presenta un contribucion grandi pa nos economia’. E grupo di personanan cu lo por warda nan aplicacion pa prome permiso ta inclui inversionista, rentista, pensionado, stagaire, rijksgenoten y personanan casa cu Rubiano. “Tur e gruponan aki lo por permanece na Aruba mientras Dimas ta pendiente pa trata nan peticion. Pa e demas gruponan e maneho vigente di gobierno lo keda aplicabel”. Pues pa e otro personanan lo ta necesario pa spera e decision final den exterior.

Segun minister di husticia e ministerio a anticipa cu lo ta mas logico pa cierto grupo di persona por warda pa e prome permiso na Aruba, ‘por ehempel pa ora ta cuida di grandinan of persona cu enfermedad e ta necesario pa e persona por cuminsa cuida e otro mas pronto cu ta posibel’. Sinembargo sr. Bikker a desmenti cu e cambio di maneho aki lo encera cu tur permiso cu ta den tramite lo wordo otorga automaticamente. “E maneho aki lo acapara esunnan cu tin derecho pa haya un permiso ora no ta make sense pa nan mester warda esaki den exterior. Pero e no ta kita si cu den e maneho aki lo trata e aplicacionnan aki na nivel individual. Nos lo reserva e derecho di evalua cada un estrictamente.”

Cartera di Integracion reuni cu Husticia

Minister di Husticia y Integracion di su banda a duna di conoce cu den e proceso di informacion tanto como formacion a bin un yamada pa integra e dos carteranan cu actualmente ta cay bou su persona bek cu otro mirando cu ‘pa hopi tempo nan tabata separa’. “A bin realisa cu durante e añanan e decisionnan cu tabata wordo haci pa ministernan di husticia y ministernan di integracion tin biaha a bay en contra otro. P’esey a wordo recomenda pa trece un maneho mas integro riba e dos terenonan aki.”

Un di e maneranan con e mandatario a ilustra esaki ta e ley di admision LTU cu no a conoce ningun cambio desde 2006 pa 2007. Segun e mandatario, e ley aki a mira si un cambio den concepto na Parlamento na 2012 y den 2014 a haci algun cambio na esaki den un nota di cambio. Pero esaki ainda ta na Parlamento. “Nos ministerio a dicidi di haci e cambio di ley aki un prioridad pasobra nos a bin ta realisa cu den maneho ta bin ta anticipa cambio den ley pero na final di dia parlamento tin cu bay aproba e cambionan aki formalmente.”

Minister nobo no lo tene mesun practica minister anterior

E mensahe cu e minister nobo kier trece dilanti ta cu lo haci un ahuste riba e parti di ley tanto como e parti di maneho pa evita cu buraconan lo tin cu wordo tapa pa medio di otro camindanan cu personanan por cana cu ta cay afo di e procedura prescribi. E mandatario a duna un ehempel di e anterior minister cu tabata firma ‘practicamente cualkier papel cu nan lo a pone su dilanti cu Akkoord conform verzoek’.

Sr. Bikker a expresa cu e no tin pensa di sigui cu e maneho aki pasobra esaki no tabata cumpli cu e principionan di bon gobernacion. “Mi no ta kere si tin un proceso y departamentonan cu ta informa e proceso aki cu e minister encarga mester por mete den casonan specifico pa medio di firma akkoord conform verzoek.” Esaki segun e mandatario ta crea un trato desigual entre personanan cu ta encamina e proceso prescribi y esunnan cu ta bati porta di bestuurskantoor.

Entrante prome di januari 2018 estadia turistico lo wordo tuma over pa IASA

Director di Iasa Gerald Vingal a splica e rason dicon a bin cu e cambio cu e departamento tabata anticipando pa algun tempo caba di traspaso di e producto aki. Pa motibo di consistencia a opta pa tene e procedura aki na Iasa unda ya caba personanan cu kier para garante pa un turista na cas por haci e proceso aki. Tambe segun sr. Vingal tabatin un situacion unda e radar di Iasa no tabata traha pues mester a bay semanalmente na Dimas cu un USB stick pa traspasa e informacion, cual no tabata semper vigente y den cierto casonan a crea complicacionnan pa turistanan saliente.

Mas aleu e maneho cu Iasa lo hiba dilanti lo ta basa riba e cantidad di fondonan cu e turistanan tin disponibel pa asina cubri nan estadia prolonga na Aruba. “Personanan cu aplica tin cu mira bon e medionan financiero cu nan tin disponibel. Por ehempel si bo tin placa suficiente pa 3 dia bo no por bay pidi un prolongacion atrobe despues di 3 dia.”

Pa loke ta trata e personanan invita cu ta cay bou garante particular, no lo ta automatico cu e personanan cu pidi esaki lo hay’e. “Mescos cu minister y sra. Ruiz Paskel a menciona solamente e categorianan di inversionista etc lo bin na remarke pa un extension turistico extra.”