Minister di labor Glenbert Croes (MEP) ta introduci un maneho nobo riba uitzendburo entrante 1 di augustus. Cu e maneho nobo, lo ta mas estricto cu companianan cu lo kier fungi como Agencia di Empleo Temporal (uitzendburo), exigiendo cu nan unico meta di operacion ta pa fungi como uitzenburo. Ademas di exigi un background den Human Resources di e operado/director.
Segun un comunicado di Directie Arbeid en Onderzoek (DAO), e maneho nobo aki lo ta vigente entrante 1 di augustus y lo ta aplicabel pa tur compania cu kier fungi como uitzendburo y cu lo kier haya of renoba un permiso di uitzend na oficina di DAO.
Maneho Mas Estricto
E maneho nob,o segun e comunicado di DAO ta, den liñanan grandi, mas estricto cu e evaluacion di e peticion y e condicionnan cu ta pone riba e permiso di uitzend. Por ehempel, DAO ta revisa si e compania cu kier haya permiso pa fungi como uitzendburo, tin e meta exclusivo di fungi como tal. Pues companianan cu banda di ta un uitzendburo, tin otro metanan den nan statutonan, no lo bin na remarke pa haya of renoba un permiso di uitzend mas. Mientras pa e peticionario, lo exigi cu mester tin un background den Human Resource Management of algo similar y cu e lo mester a completa un curso basico den leynan laboral Arubano. Banda di esaki e lo mester tin 3 aña di experiencia den e ramo di uitzend.
Tin varios condicionnan mara na e permiso di uitzend. Riba e banda di e trahado, no ta permiti en absoluto pa e uitzendburo pone un trahado cu tin un permiso regular di estadia y trabou cerca cierto dunado di trabou na disposicion di otro. Sin embargo esaki no lo conta naturalmente pa personanan cu permiso firma liber. Adicionalmente, cambionan remarcabel ta inclui cu ta mas estricto cu formalidad entre e agencia di empleo temporal, e dunado di trabou y e trahado: E agencia mester firma un acuerdo, preto riba blanco, tocante nan disposicion pa bira un trahado temporal di un compania. Pues, mescos lo conta pa e dunado di trabou cu lo kier tuma trahadonan temporal.
Despues di evalua e peticion, DAO ta traha un conseho y mand’e pa minister. E ta e instancia cu ta tuma e decision si e peticionario ta haya e permiso di uitzend si of no. Si e minister dicidi pa duna e permiso, e peticionario tin cu paga e restante di 2250 florin, pa e por haya su permiso di uitzend.
Finalmente, como extra servicio DAO lo organisa un sesion informativo obligatorio pa e peticionario cu a haya un permiso di uitzend. Den e sesion aki lo duna informacion riba e ley di uitzend, e derecho y obligacionnan di partidonan envolvi den e relacion triangular y e supervision riba cumplimento cu e ley di uitzend.
