Maneho di renobacion di permiso ta temporal; Gobierno mester evalua cupo di trabao disponibel prome

E crisis di coronavirus/Covid-19 a trece cune cu cantidad di trahadonan a wordo manda cas. E cifra ta miles cu a keda sin trabao of nan condicion di trabao ta na peliger debi cu nan fuente di trabao su existencia ta instabil financieramente of ya caba a disparce.

Tambe tin e situacion di cantidad di trahadonan di afo cu a bin contribui cu nan trabao na e desaroyo economico di nos pais. Ta esnan cu ta traha a base di un permiso cu a perde trabao y cu no por haya otro trabao y cu normalmente nan lo mester bandona nos pais. Ya caba minister di Husticia, Andin Bikker a manda un mensahe den e direccion ey.

Contestando pregunta di Bon Dia Aruba riba maneho di esnan cu mester renoba nan permiso di trabao y estadia den e dianan venidero, e mandatario a señala cu ainda e ta deliberando cu DIMAS riba e tereno aki.

E mandatario a bisa cu nan a delinea un maneho cu ya caba ta finalisando. Tambe el a splica cu tin diferente circunstancia actualmente. Minister Bikker a laga sa cu e maneho cu nan ta finalisando eventualmente e siman aki, e lo ta uno temporario. Pasobra nan mester tene cuenta cu e ambiente laboral na Aruba cu obviamente a cambia debi na e crisis di Covid-19.

El a laga sa cu hunto cu su colega di Labor, Glenbert Croes nan ta trahado cu e departamentonan concerni pa bin cu un evaluacion di kico ta bay ta e cupo di trabao disponibel na Aruba. “Esaki ta algo cu nos mester haci e inventarisacion eynan.” el a bisa.

Minister Bikker a declara bon cla cu e maneho cu nan ta trahando aworaki ta algo temporario, te ora cu gobierno por defini kico e ambiente di realidad nobo di e cupo di trabao disponibel na Aruba ta bay ta.

Renobacion

Segun maneho delinea, normalmente un persona mester cuminsa haci nan solicitud di renobacion di permiso tres luna prome cu su permiso ta caduca. Teniendo na cuenta e maneho aki, varios persona ta supone cu a entrega caba nan peticion. Esnan cu a entrega na tempo logicamente nan lo atende cu nan.

Sinembargo e grupo grandi cu no a atende nan mes na e maneho di tres luna prome, ta debi entre otro cu no por entrega nan documentonan debi na e restriccion cu Covid-19 a bin cune. Algun di nan ta confronta dificultad, ya cu nan periodo di vencemento di nan permiso a yega of nan ta cerca di caduca.

El a bisa cu siman pasa caba DIMAS a bin cu un grupo cu ta atende cu e casonan mas urgente, entre otro caso di personanan den reto medico pa medio di AZV.