Den un carta cu Fundacion Gobernacion di Calidad Aruba a manda na minister di Integridad, Ursell Arends (Raiz) na februari ultimo, nan ta urgi atencion pa e consecuencianan di e politica di personal cu gobierno di Aruba ta bin implementando desde comienso di Status Aparte. Alabes nan ta duna algun recomendacion pa por adresa esaki.

Den su carta, Fundacion Gobernacion di Calidad Aruba (SDBA pa su siglanan na Hulandes) ta analisa con “desde comienso di Status Aparte, e politica di personal di gobierno Arubano ta problematico. Esaki ta/tabata principalmente pa motibo di e sistema di patronahe politico.” E fundacion ta recorda cu na 1995, durante Simposio di Reino, e participantenan di Antias hasta a conclui cu patronahe politico ta practicamente inevitable riba e islanan: “Bon gobernacion ta mal politica.”
Y pues, segun e carta, “mal gobernacion a bira e norma, asina tambe nombramento politico.”

Un di e pio consecuencianan di esaki pa Aruba ta cu e politica di personal a conduci na obligacionnan financiero insostenible na Aruba, haciendo cu desaroyonan positivo den mayoria di area y desaroyo economico ta bira imposible, pa motibo di e falta constante di fondo pa e inversionnan necesario den un politica di desaroyo.

“Casi tur aña, tur cuerpo consehero y supervisor na Aruba, ademas di IMF y nos partner mas grandi den Reino a adverti contra e ‘tradicion’ aki,” e carta ta continua. “Nan tambe a haci recomendacion pa mehoracion. Esaki tur a keda completamente ignora pa e gobiernonan sucesivo di diferente color politico, sin obstaculo di un Parlamento critico.”
Manera Bon Dia Aruba a publica den un articulo titula “Parlamento: e aspecto mas grave contribuyendo na deficit democratico”, den nos edicion di dia 24 di april ultimo, “Parlamento di Aruba sistematicamente a viola su responsabilidadnan”, y “Parlamento tampoco nunca a worry tocante problemanan importante manera patronahe politico,” entre otro fayo, manera deficiencia den control financiero.

“Den combinacion cu deficiencianan serio den maneho financiero, ‘politica’ a carga e poblacion Arubano cu un debe enorme,” segun SDBA. “E debe aki ta esencialmente impagable, y e interes anual so actualmente ta mas di Afl. 300 miyon.”

Sinembargo, ta enfatisa cu accionnan administrativo inapropia no ta resulta den daño solamente financiero, sino cu e nombramento di ambtenaar a gran escala tambe a tuma lugar sin cu mayoria di e individuonan involucra tin e cualificacionnan necesario. Tambe a viola un cantidad di provision legal.

SDBA ta destaca cu e nombramento di personal no cualifica den poscionnan hopi biaha demasiado halto cu e salarionan corespondiente, entre otro, a causa un gran malcontento entre e personal cu si ta cualifica, loke no ta beneficia e atmosfera laboral.

“Esaki ta nifica cu administracion Arubano a proba pa mas di 35 aña cu no tin e sentido di responsabilidad necesario pa conduci un politica di personal adecua. Dentro di e malesa financiero actual, cu ta en gran parti e resultado di esaki, ta bira pues inaceptable pa e administracion Arubano mantene e responsabilidad pa e nombramento di personal di gobierno.”

Tambe mester considera e hecho cu na momento cu ta nombra hende cu no ta adecuadamente capacita na puestonan halto cu hopi responsabilidad, ta baha e calidad di servicio cu ta ofrece na ciudadanonan. Esaki ta nifica cu pueblo ta paga hopi caro pa un servicio di calidad baho.

Manera Bon Dia Aruba a publica dia 15 di augustus ultimo, Den un analisis haci na 2019, riba peticion di gobierno di Aruba mes, IMF a presenta un panorama completo di tur gasto di personal di gobierno, unda a resulta cu na aña 2018, e aña di cual a analisa e cifranan, e gastonan total di gobierno tabata Afl. 605 miyon, incluyendo e sector di enseñanza subsidia. Sin embargo, si inclui tambe e demas entidadnan subsidia (fundacionnan p.e.), e total di gasto di gobierno ta yega na Afl. 677 miyon. Esaki pa e aña ey tabata 51% di e gastonan total di gobierno. Esaki ta ilustra e punto di SDBA, cu ta pa motibo di e gastonan halto aki di personal cu gobierno perpetuamente “no tin placa” pa inversion y por ehemplo, diversificacion di economia.

SDBA ta considera cu tin dos accion cu ta necesario pa remedia esaki. E prome ta kita e responsabilidad total pa nombramento di personal di gobierno for di administradornan a corto plaso. E nombramento – basa riba un plan di personal pre-aproba pa tur departamento di gobierno – y retiro di personal mester bira e responsabilidad di un institucion independiente, manera proponi pa Sindicatonan Uni na aña 1995. Mester considera e nombramento directo di personal di gobierno pa administradornan como un acto di corupcion.

Y di dos, a corto plaso, gobierno di Aruba mester conduci un kerntakenanalyse, y despues ehecuta e resultado di esaki sin retraso ni reserva.

Tambe mester considera cu e sistema politico actual di Aruba ta presta facilmente pa patronahe politico, entre otro fayo, door di enfoca riba partidonan politico. Tal bes ta ora pa pueblo di Aruba cuminsa e combersacion riba alternativanan pa e manera con ta organisa y goberna nos pais.