Maneho di husticia ta exigi pone prioridad

E acuerdo di gobernacion entre e partnernan di coalicion firma recientemente ta duna, pa loke ta e asuntonan cu ta bay toca e proximo ministro di Husticia, un lista impresionante di asunto cu mester bay atende. Di un plataforma nacional den cual ta participa tur instancia cu mester ta aden, te na adaptacion di ley di admision y expulsion (LTUV), ta hopi asunto pa atende y ta logico cu no por atende tur desde inicio.

Cu gobierno nobo ta desea di haci visibelmente algo na criminalidad ta logico. Aumenta cantidad di polis riba caya ta bay ta costoso, tanto na personal como na material y ekipo. Pero ta necesario duna atencion na training di polis nobo, solamente pa cumpli cu e fluho saliente di agente di edad di pension. Ta importante pa banda di e personal dedica atencion principalmente na uzo di metodo moderno di recolecta informacion y yega na un grado mas halto di resolve caso, sin cu esaki ta implica un utilisacion mucho mas grandi di personal. Supervision di camara ta algo cu a priminti pa hopi tempo caba, principalmente den area di hotel. Pan di mayoria di nos poblacion ta depende di e trankilidad y siguridad den e zona ey y duna esaki prioridad ta no mas cu logico.

Control di costa ta importante, mas tanto pa evita entrada di droga y arma. Tin un cierto fluho di persona cu ta drenta via costa, pero experiencia ta cu e gran mayoria ta simplemente drenta como turista na aeropuerto o waf y no ta sali mas. Un di e prome tareanan ta pa e cuerponan uniforma cuminsa haci uzo di e informacion cu tin disponibel, pa hopi aña caba, di tur persona cu a drenta y no a sali mas.

Naturalmente tur esaki ta concerni represion, y ta importante pa traha riba prevencion. Esaki ta rekeri acopla tereno di husticia cu otro area di trabao gubernamental. Ta menciona por ehemplo e uzo di trahado social den e trabao den bario. Nos no ta mira ainda con esaki ta ser organisa, pero un punto positivo ta cu esaki lo ta contrario na e maneho ilogico di gabinete anterior di concentra e trabao social den un par di oficina so, y hasta un dado momento a pasa pa kier concentra tur trahado social den oficina principal na Playa. Awor henter e area di Noord ta obliga di bay Paradera pa acudi na Asunto Social pa bijstand. Na luga di sigui e regla di cu e trahado social mester ta mas cerca posibel di e cliente, den e añanan cu a pasa lo contrario tabata e caso. Ta di spera cu awor por implementa un trabao conhunto adapta, cu e mal experiencia aki na bista.

Cu despues di e luz negativo cu tabatin pa gran parti di e aña aki riba e proceso di admision di stranhero, gobierno nobo ta bay reorganisa e departamento encarga cu permiso di estadia ta parce logico. Corta e tempo di tramita un permiso drasticamente ta bon pa economia, menos tempo pa warda prome un empleado di exterior por cuminsa traha, pero ta bon pa combati corupcion tambe. Proceso largo y no transparente ta loke ta brinda oportunidad pa esunnan cu ta desea di soborna nan ruta pa yega na un permiso. Ta presion y desesperacion pa warda lunanan largo ta haci cu doñonan di trabao ta cuminsa busca un ruta mas cortico y esey ta paga pa haya e permiso. Nos no a caba di contempla e desastre cu esey ta causa, pasobra caso Ibis no a ni yega corte ainda.

Ta di spera cu den e mesun esfuerso ta hinca e trayecto di conseho riba mercado laboral tambe, pa minimalisa e corupcion cu por tuma luga aki den. Un simpel declaracion di e proximo ministro cu mester maneha esaki cu e si ta di confia, den e contexto di mehora integridad y transparencia, no ta suficiente. Y papiando di transparencia, lo ta recomendabel pa na mesun momento crea un sistema di tracking pa e cliente por sigui e proceso di tramite y por haya sa te unda e proceso a avansa caba. Cu esaki lo bay haya cierto resistencia den e aparato por ta e caso, pero no motibo pa no hacie. Tambe lo mester institui un bon sistema di control interno, tanto na Labor como na Dimas. Y si ta institui un Camara di Integridad, anto por crea tambe e procesonan formal di reportahe na e organismo aki, cu posibilidad di paso hudicial tambe. Esaki hasta si e ministro(nan) di turno ta envolvi.

Tambe ta parce logico pa laga Dimas muda pa ministerio di Husticia atrobe. Nos sa e motibo pakico un departamento asina a end up bao ministerio di Infrastructura, y cu tabatin cuestionamento di e situacion na Aruba den e consulta entre e ministronan di husticia di Reino, pero den gabinete Eman no tabatin boluntad pa actua contra e kroonprins di e partido. E consecuencianan di e situacion aki no a caba di surgi ainda y no ta mas cu normal pa pone e cosnan aki na nan luga di e prome momento caba.