Parlamentario actual, Richard Arends (AVP) a reacciona riba e declaracion haci pa prome minister Evelyn Wever-Croes (MEP) y su minister di Finansa, Xiomara Maduro (MEP), riba e situacion di financia publico cu nan a hereda di e gobierno anterior.
Parlamentario Arends kende tabata ex minister di Economia y consehero di ministerio di finansa di e gabinete Mike Eman I y II, a bisa cu e ta asombra cu ya caba e gobierno di coalicion (MEP-POR-RED) a anuncia cu nan no por cumpli cu e normanan di CAft, manera e ta pa 2017, pero tampoco pa 2018. E norma di e colegio di supervision fiscal aki ta stipula un deficit di 0.5% cu ta alrededor di 25 miyon florin pa 2017, y un surplus di 0.5% kiermen un 25% mas riba entrada di gobierno pa 2018.
Normanan di Caft
E ta haya cu esaki ta normanan cu a keda aproba den e ley temporario di Landsverordening Aruba financieel toezicht na 2014. El a agrega cu for di e tempo ey tur aña e gabinete di gobierno anterior a sa di cumpli cabalmente cu e normanan di supervision financiero. Tur e rapportnan aki ta accesibel publicamente riba e website di CAft, unda ta para cu durante e henter e periodo aki e gobierno cu el a forma parti di dje a sa di cumpli cu e normanan manera a keda acorda den e ley di supervision aki.
E no ta splica su mes cu tres siman pasa dia 16 di november nan a entrega e presupuesto complementario 2017. Ya caba nan a yega di traspasa e mandando di nan gobernacion cu e siguiente gobernacion, y e tabata un presupuesto cu tabata cumpli cu e normanan di 0.5% supervisa pa CAft. Segun parlamentario Arends, e gabinete anterior a sa di reduci e deficit di 9.4% pa 0.5% pa 2017 cu ta alrededor di 500 miyon florin. Kiermen nan a sa di recorda e deficit presupuestario cu casi 125 miyon florin pa aña.
Supervision
E mandatario actual di Financia a yega di indica cu e cifranan financiero cu gobierno anterior a bin cu ne ta cifranan cosmetico of fabrica ya cu -segun nan analisis- ta existi un deficit di algo mas cu 100 miyon florin pa 2017. Ademas nan ta premira -segun nan analisis financiero- cu pa 2018 e deficit lo ta di mas cu 200 miyon florin. Ex minister Arends a tuma nota di e declaracion aki, y el a bisa categoricamente cu ‘no tin niun area di maneho cu tabatin tanto escrutinio y tanto transparencia manera financia publico’.
E gobierno anterior tabata bou escrutinio y supervision di CAft, locual ta indica cu tur presupuesto y tur cambio di presupuesto complementario mester bay cu un conseho di CAft. Pero tambe mirando e constelacion di miembronan cu ta integra na CAft pues no solamente na Aruba “finansa publico ta cla y tin hopi claridad, pero tambe den Reino, y tambe na Hulanda, tur tres instancia ta na haltura pa loke ta trata financia publico.” E constelacion mes di e integrantenan di CAft ta consisti di un miembro di Reino Hulandes cu ta e presidente, un miembro di Aruba y un miembro apunta via e gobierno di Hulanda.
Ademas den cuadro di escrutinio y supervision riba financia publico, el a laga sa cu nan a entrega 10 kwartaal rapport cu nan relato di cada kwartaal relaciona cu e desaroyo di e gastonan di e gobierno y tambe entradanan. Tur e rapport aki a wordo entrega na parlamento.
E ultimo rapport aki a wordo entrega na mita di november y esaki a forma e base tambe pa traha e presupuesto supletorio, unda e gastonan ta segun e presupuesto. Ex mandatario a indica cu a wordo gasta 75% di loke a wordo presupuesta y entradanan tabata cuadra tambe.
“Hopi asombro mi ta wak cu awor ta wordo bisa cu cifranan ta wordo manipula.”
Entradanan cu no a drenta
Tambe el a referi encuanto e cifranan cu no a drenta den caha di gobierno y cu –segun minister actual di Financia- a contribui na e deficit di mas cu 100 miyon florin riba presupuesto di 2017. Nan ta 50 miyon di winstbelasting, 7 miyon di aduana (invoerrechten) y e resto di Refineria di Aruba.
Ex minister Arends a declara cu pa loke ta trata e fondonan cu mester drenta di e Refineria di Aruba (RdA) tin un palabracion cu e instancia estatal aki cu e fondo di 73 miyon florin lo wordo entrega prome cu fin di aña. E ta recorda cu pa loke ta trata aña presupuestario di 2017, e cuenta anual ta cera te cu maart 2018, pues ainda tin un periodo pa cumpli cu ne. El a agrega cu ‘e fondo a wordo comprometi cu e lo drenta’.
Riba e 50 miyon di winstbelasting e fecha final pa paga e belasting aki tabata 30 di november. “Atrobe mi no sa si señora minister a ricibi e reporte nan caba. Pero mi no ta kere cu den tres dia ya caba a ricibi e reporte nan di kico a drenta.”
Tambe e ta asombra cu e gobierno actual no tin un plan ainda defini pa loke ta trata 2017 y tambe 2018, ya cu esaki tabata e esencia di e campaña cu a wordo hiba den eleccion ultimo, caminda nan a anuncia un plan di reduccion di cantidad di ministernan, coordinadornan y cortamento di luho pa reduci e gastonan cu 50 miyon florin. “Con por ta cu aworaki bo no tin un plan mas.”
