Si tin un area unda e gabinete nobo a hereda un situacion bastante desanimante ta riba tereno di energia. Un aspecto cu sigur ta resalta ta e situacion di produccion di energia renovable, cu awe na 2025 no ta brinda mucho mas cu e situacion na 2008 despues di e entrada den operacion di e parque d molina na Vader Piet. Segun e plan di gobernacion pa 2025 – 2029 nos ta na un nivel di contribucion di energia renovable di 14 – 15% di e total cu WEB Aruba NV y Elmar NV ta distribui. Por ta cu e calculo aki ta un par di porciento mas abao cu e realidad, pero esey no ta cambia e panorama general. En todo caso no mas halto cu e situacion na 2008… Tempo pa un memoria refresca, pa no cay den e mesun trampa atrobe?

Kico realmente a sucede den e decada y mey cu a transcuri desde e fecha di inicio menciona y awe? Nos por constata cu no a falta iniciativa di e gabinetenan cu a goberna den e periodo aki pa hiba nos prestacion riba tereno energetico na un mihor nivel. Por lo tanto no a falta tampoco e metanan proponi cu tabata briya pa un aspecto particular: falta di realismo den posibilidad di ehecucion. Esaki tabata visible den e intentonan pa trece alternativa pa e uso di heavy fuel oil (HFO), cu e resultado cu tur a fracasa. Tabata trata di proyecto di trece gas natural liquido (LNG) pa gabinete Eman I y II, proyecto di gas for di desperdicio procesa, proyecto no. 2 pa trece LNG bao di e dos ultimo gabinetenan, proyecto di produccion di hidrogeno, cual a keda pega den e fase di exploracion.

Den trasfondo di e maneho fracasa aki, e intentonan di reapertura di e refineria tabata hunga un papel importante. Durante gran parti di gobernacion di e cuatro gabinetenan aki tabata reina un optimismo desmedi cu lo logra e reapertura ey, loke no tabata cuadra cu realidad di e sector ey, altamente organiza na nivel mundial. E optimismo aki tambe a conduci na e speranza cu e introduccion di LNG lo a haya un base suficientemente amplio pa por ta rentable, cu e refineria como cliente mayor. Sin esey, y WEB como unico cliente grandi pa LNG, e perspectiva pa un distribucion rentable a desaparece. Loke teoricamente lo tabata un alternativa, e distribucion di LNG den cantidad chikito, den un ISO-container, di tamaño di un container standard di 20 pia, ta resulta demasiado chikito pa e uso di combustible cu WEB tin. For di e plan di gobernacion nobo nos por comprende cu lo bay revisa e contrato cu Eagle LNG, pa mira kico pa haci cune. Nos no tin e impresion cu esey lo cambia e panorama di futuro tanto, hustamente pa via di e base hopi limita sin refineria, y lo mester bay contempla otro opcion, sin llanto, sin lamento.

Pa loke ta e avance den otro produccion di energia limpi, energia solar por ehemplo, por constata cu ningun proyecto mayor di energia solar, di varios MW cada un, ta funcionando y/o suministrando energia na WEB/Elmar actualmente. Loke website di WEB mes ta mustra ta algun proyecto mediano di menos di 100 kW. E panelnan solar en total ayera casi tabata yega na duna 3 MW durante e oranan efectivo.

Ta parce nos anto un bon scogencia di e gabinete nobo pa opta pa pone mas enfasis riba generacion di energia solar na empresa y vivienda, envez di lanza otro iniciativa hopi grandi cu ta depende di inversion di exterior. Ademas gobierno tin planea pa usa edificio escolar pa instala panel solar pa haci e uso di energia di e scolnan mes mas sostenible. Mester por contempla tambee otro edificionan di gobierno cu por probecha di un suministro (parcial) di nan propio consumo di electricidad. Tur esaki ta factible solamente cu un cambio drastico den e manera con ta mira e produccion individual cu un aporte hopi mas grandidi e ciudadano mes. Te awor tabata contempla e aporte di e ciudadano individual como un categoria no asina relevante y e empresanan estatal tabata duna e impresion di prefera keda traha cu algun proveedor grandi y no mester bay mete cu miles di cliente individual den produccion. Por lo tanto henter e proceso di logra financiamento, regla permiso pa finalmente por opera tabata por lo menos algun paso di mas pa un individuo cu un conocimento averahe di e tecnologia aki. Si nos mira con por ehemplo na Europa, y ban tuma como Hulanda como ehemplo, por constata cu e diferencia grandi ta e forma di acerca e consumidor cu dado momento ta bira co-productor y ta ser trata tambe como tal, den un sistema totalmente digitaliza.

Tur e parti positivo aki no ta kita cu un situacion na un isla manera Aruba ta trece su problemanan specifico. Por ehemplo, nos no ta conecta cu ningun red di distribucion di energia externo, un situacion ‘stand alone’ anto.Nos ta corda cu algun tempo pasa tabata referi na e caso di e isla Spaño Mallorca, cu un proyecto di hidrogeno integra den su sistema di produccion. Masha bunita, pero Mallorca ta conecta via cable cu tera firme y no ta depende solamente di produccion local; esy ta cambia e asunto completamente.

Finalmente, e situacion awe ta cu combustible fosil ta percura pa e mayor parti di nos energia electrico. Perspectiva ta cu nos por bay dal paso chikito pa cambia esey, cu un realismo paga boncaro caba…