Ayera, finalmente y cu hopi expectativa, principalmente pa e comunidad di migrante cu a bin Aruba pa reforsa nos mercado laboral, a wordo anuncia e cambionan riba maneho di admision y otorgamento di permiso di parti di DIMAS.
PR di DIMAS, Marilyn Wout, a bisa cu e maneho aki a wordo stipula un dor di un comision cu ta forma parti di e cadena di stranheria for di ministerio di Labor y di Husticia. Nan a bin hunto pa traha riba recomendacionnan den cuadro pa cuida e orden publico, salvaguardia e bienestar en general.
E maneho aki ta basta restringi pa duna proteccion na cinco grupo di persona cualifica como esunnan cu ta bay haya preferencia riba mercado laboral (lesa pagina 2). Ya caba e medidanan anuncia a cuminsa produci preocupacion cerca e dunadonan di trabao, pero tambe indignacion cerca e trahadonan migrante cu a bin traha legalmente na Aruba. Sinembargo di parti di gobierno a purba di orienta y modela e maneho di admision pa asina por logra metanan social economico y garantisa e efectonan desea.
Maneho di admision
Esaki ta un resumen di e cambionan riba e maneho di admision cu ta keda introduci como medida temporal relaciona cu e situacion di e mercado laboral ocasiona dor di COVID 19 ta:
– A introduci un stop riba prome peticion di permiso pa trahadonan migrante: Te cu pronto aviso peticionnan di prome permiso laboral lo no wordo otorga, cu excepcion di esnan cu ta cay den e categoria di excepcionnan manera e migrante di conocemento (kennismigrant), key positions den sectornan defini, e inversionista y esnan cu lo traha den e promising sectors.
– Prolongacion di permiso limita: E mercado laboral a cambia di forma drastico cu ta trece un control mas estricto door di e autoridadnan concerni. Personanan cu tin menos di 5 permiso lo por haya un renobacion di nan permiso di trabou den caso cu e mercado laboral ta permiti y nan ta den poder di un documento positivo di DPL.
– Cambio di firma: Cambio di firma (dunado di trabou) of funcion no lo ta posibel mas pa personanan cu tin menos cu 5 permiso, cu excepcion si e persona ta bay traha den un di e sectornan defini como prometedor.
-Prome permiso den exterior: E regla principal cu ta bisa cu tur persona stranhero cu aplica pa un prome permiso mester warda e contesta riba nan peticion den exterior, ta keda aplicabel. E maneho di exoneracion di esaki a wordo limita y a bira mas estricto. Cierto gruponan cu prome cu e pandemia tabata conta cu un flexibilisacion. Awor mester tene na cuenta cu esaki a wordo limita. Esaki ta conta principalmente pa esnan cu ta bin pa stage y pa prome permiso laboral regular, hasta si tin un
documento positivo di DPL.
– Stop riba prome peticion pa reunificacion familiar: Mirando e cambionan riba mercado laboral, unda gran parti di nos forsa laboral a perde nan entrada parcialmente of a perde trabou pa via di e crisis socioeconomico cu a surgi dor di e pandemia a bin cu cierto cambio. Esaki debi cu un gran parti ta personanan cu tin un permiso laboral. Pa e motibo aki tambe permisonan di reunificacion familiar, lo no wordo otorga mas te cu proximo aviso, cu excepcion si e garante ta cay bou di e categorianan di articulo 1, 3, 7 A y esnan cu ta cay bou di articulo 7 y ta wordo considera como di importancia vital.
– Norma di inversion pa obtene un permiso como accionista y/of inversionista: Un cambio mas cu a surgi ta e normativa pa e capital di un inversionista cu a bira Afl. 250.000,-
pa loke ta trata e capital cu un inversionista. E cambio aki ta alinea cu e maneho nobo di gobierno pa inversionistanan.
-Sectornan prometedor: Pa logra un diversificacion di e economia a defini gruponan di migrante cu si lo por sigui pidi permiso den caso nan kier bin biba y of traha na Aruba. Entre otro a defini cu migrantenan di conocemento ta bonbini na Aruba. Tambe ta wordo yama bon bini na Nomads y Start Ups kendenan ta emprendedornan cu ta traha remote pa mercadonan cu no ta Aruba. Tambe inversionistanan innovativo den e sectornan prometedor (logistica, agricultura moderno etc) of sectornan existente ta bonbini, relaciona cu e creacion di cuponan di trabou nobo cu ta sumamente necesario pa cubri e necesidad cu tin bou di e grupo defini como preferente riba e mercado laboral.
PR di DIMAS, Marilyn Wout, a laga sa cu pronto lo por haya e informacion aki disponibel riba e website y Facebook-page di DIMAS riba e metanan di estadia nobo y nan rekisitonan.
