Aruba no ta crece mas; esey nos tur sa… Bon, casi tur, en todo caso. A pesar di bunita ley pa regla uso y desaroyo di teritorio (limita) ta parce cu net cerca esnan cu pa añanan largo tabata na vanguardia di percura pa regulacion efectivo y sensato di nos superficie limita, awor ta carece di e sano huicio pa na manera corecto y eficaz haci uso di e facultadnan cu e ley (ROP) ta brinda. E caso na cual nos ta referi ta esun unda a otorga dos tereno na Sero Alejandro, ambos pa ser usa pa establece un chickenfarm.

Laga nos cuminza cu bisa cu di ningun manera nos ta contra establecimento di actividad economico, siempre y cuando esaki ta sucede dentro di lo razonable, tumando na cuenta interes di otro ciudadano cu posiblemente por keda perhudica cu tal actividad. No ta necesario ‘corda nos’ cu Aruba mester di actividad economico na e momento aki, esey ta di conocimento general.

Sin embargo, den e caso particular aki tin mas aspecto cu cual mester tene cuenta, cu simplemente y burocraticamente yega na e conclusion cu en principio e actividad referi ta posible y permiti den e zona particular ey. E zona no ta parti di e area protegi di Parke Nacional y ta cay segun nos informacion den loke ta caracterisa como ‘landelijk gebied’. Si nos Hulandes y conocimento di terminologia planologico Hulandes no ta laga nos na caya, esaki ta un area unda ta permiti cierto forma di vivienda y cierto actividad economico so, cu no ta na perhuicio di mantenimento di e caracter ‘landelijk’ aki. Esey ta haci cu no ta permiti actividad economico di gran escala, cu ta constitui un menaza pa e paisahe manera e mester keda, incluyendo naturalmente salvaguardia mas tanto posible e vegetacion cu ta forma parti di loke ta duna e area ey su caracter distinto y cu ta valioso pa keda conserva.

Aki so caba ta bira dificil pa comprende cu di nochi pa mainta ta pasa pa roza un tereno grandi completo, sin nunca a surgi e pregunta kico lo por a conserva di e vegetacion na e lugar. Mester ta asina cu nos no por y no mester spera nada mas di un departamento dirigi pa academico, cu nan ta tira un vista riba e reglanan anto yega na conclusion cu no tin nada pa stroba otorgamento di e tereno? Anto nos por a mantene e nivel di gerencia den e departamento na nivel MAVO y talvez hasta topa cu mas sano huicio?

Ta asina dificil pa yega na e conclusion, hustamente pasobra Aruba ta chikito, cu cierto actividad economico ta trece sin duda algun un molester grandi pa e bisiñanan, principalmente esnan mas pabao di unda e negoshi ta bay opera? Un chickenfarm, pa esey tampoco mester di grado academico, ta pertenece na e actividadnan cu ta causa molester. Sigur si ta na un nivel industrial, ta casi imposible pa preveni molester pa e otro parcelanan mas cercano, sea cu ta trata di vivienda of otro actividad economico. No ta pornada tin varios peticion tambe pa e tipo di negoshi aki pa e area di Butucu, cu en todo caso ta keda mas aleha di e areanan cu vivienda y cu ta brinda mihor posibilidad pa preveni e problemanan aki. E ta un di e poco oportunidadnan cu tin ainda riba nos Aruba sobrepobla pa ‘fit in’ e tipo di actividad aki. Sin embargo, nos ta comprende di algun peticionario pa e area di Butucu cu net nan no por keda cla cu nan peticion pa tereno, pa e mesun tipo di actividad aki. Un poco straño cu ta adelanta net e casonan unda cualkier persona cu un poco sentido comun por deduci cu ta bay tin reaccion di otronan den comunidad cu tin interes contrario. Henter e ley di ROP ta traha pa regla y maneha e tipo di interes contrario aki.

Banda di tur esaki nos a keda perpleho di topa cu tanto incomprension y falta di voluntad di duna servicio. Ta increible cu un reportero di e corant aki ta haya tende di director di DIP cu no ta duna ‘inzage’ di e aanlegvergunning cu supuestamente e compania mester a haya promer cu a cuminza roza. Ley ta bisa – articulo 24 di ROP – cu e aanlegvergunning mester ta na oficina di e Directie pa revision di un y tur (“voor eenieder ter inzage”). Ademas mester anuncia e oportunidad pa revisa e aanlegvergunning, segun indica den articulo 6 inciso 2 di e mesun ley. Esaki ta encera cu mester anuncia esaki den tur corant, tanto na Hulandes como Papiamento. Nos no a mira nada…

E problema aki no ta cu tin critica riba un departamento cu no ta haci su trabao corectamente so. Si ta esey ta e keho anto nos por cuminza un edicion special diario pa atende loke e publico ta haya di gobernacion. E tristo ta cu nos ta papiando aki di e departamento unda pa añanan largo tabata sucede cantidad di cos cu no ta soporta luz di dia, cu tin dos ex-ministro den problema hudicial grave y cu urgentemente mester mehoracion. Mas ainda bao di un gobierno cu ta usa e palabra ‘transparencia’ como consigna clave. Sikiera den tempo di campaña nos por a mira algo di esaki.