E siman aki a sali un articulo den prensa den cual Sindicato SADA ta cuestiona e hecho cu tin ambtenaar na Aduana cu ainda no a huramenta y cu Gobernador lo a duna instruccion pa para e huramentacion debi na e pasado disciplinario di e Director di Aduana.
Banda di esaki e sindicato ta cuestiona tambe cu desde aña 2019 nan a pidi Minister di Finanzas pa bin cu un solucion y cu segun nan, e mandato cu e Director di Aduana tin pa haci huramentacion di Aduaneronan no lo ta bon of valido.
Minister di Finanzas, como e minister encarga cu Cuerpo di Aduana, a informa cu e mandato duna na e Director Sr. Ricky Croes na aña 2017 door di su Excelencia Gobernador di Aruba pa haci huramentacion na Departamento di Aduana ta uno valido. No obstante e hecho cu e director di Aduana den su funcion anterior na Departamento di Impuesto a haya un multa disciplinario, esaki no a ser considera di tal indole cu mester a kita e mandato cu Gobernador a duna na su persona como Director di Aduana pa por haci huramentacion.
Minister di Finanzas ta splica den un comunicado di prensa cu e motibo cu e huramentacion di Aduaneronan nobo no a tuma luga ainda tin di haci cu e hecho cu Departamento di Recurso Humano ta trahando riba un procedura nobo pa huramentacion di tur empleado publico. Den e procedura nobo, Gobernador lo huramenta tur director prome y despues lo ‘mandateer’ nan (di nobo) pa asina e director por huramenta e empleado publico di e departamento bou nan encargo.
El a finalisa bisando cu tur empleado publico, incluyendo Aduaneronan nobo, lo keda huramenta debidamente.
