Ora ta trata derechonan di persona homosexual y transgenero, tanto Minister di Husticia como Minister di Asunto Social ta premira cu lo bin cambio, maske esaki lo tuma su tempo. Minister di Husticia ta spera cu pa fin di aña lo introduci geregistreerd partnerschap (union civil registra), mientras e mandatario social a priminti di boga pa persona transgenero ora Conseho di Minister trata e topico.
Desde 2016 ora cu Parlamento a aproba pa cambia Codigo Civil di Aruba, bou cual tabata cay cambionan den herencia, geregistreerd partnerschap y un cantidad extenso di demas cambio, e implementacion di e ley aki a tarda basta. Minister di Husticia Andin Bikker (POR) a indica cu desde e aprobacion, gobierno a publica e ley, maske pa bin cu e Invoeringsverordening (ley pa introduci cambionan amplio den varios ley). “Pa un ley asina bin na vigor bo mester bin cu e Invoeringsverordening, den cual ta cambia varios otro ley. Si ta leynan di Censo, y otro leynan cu ta interactua cu e Codigo Civil, e Invoeringsverordening mester pasa su proceso.”
Bikker ta spera pa cambio den Codigo Civil yega Parlamento pa fin di aña
Actualmente e Invoeringsverordening ta na departamento huridico Directie Wetgeving en Juridische Zaken (DWJZ). Minister Bikker a declara den conferencia di prensa semanal di gobierno cu unabes cu esaki sali DWJZ ta tum’e den Conseho di Minister y djey e ley ta bay pa Raad van Advies pa despues por caba cu e proceso. “Mi ta calcula cu pronto, kisas pa ciere di aña e lo yega Parlamento.”
Minister a subraya cu e ley aki tin un embergadura hopi amplio, comentando cu ‘segun mi e capitulo riba e topico di geregistreerd partnerschap ta un parti relativamente chikito di dje, pero claro importante pa varios persona sigur’.
Ora Conseho di Minister trata tema di persona transgenero mandatario social lo boga pa nan
Na mesun momento den un anterior declaracion di Minister di Asunto Social y Labor Glenbert Croes (MEP) e mandatario a declara cu pa loke ta trata e grupo di persona transgenero, na momento cu e tema aki yega na nivel di Conseho di Minister, e mandatario lo boga pa nan. Na ki momento lo trata e topico aki e minister no a specifica, señalando cu e no ta experto riba e tereno psicosocial ni riba e tereno di salud. “E no ta un tema cu mi ta domina, pero mi ta compromete mi mes cu bo (red. reportero) pa trece e preocupacionnan na dilanti ora e discusion bin dilanti den Conseho di Minister. Pa asina inclui tambe e grupo aki aunke cu ta uno chikito.”
