Mandamento di placa pa yuda famia na Centroamerica a aumenta na 2017

(ElNuevoDiario) – Divisa gana den exterior ta continua como un di e ingresonan importante pa e paisnan di America Central. No solamente hopi famia ta depende di e placa cu miembro di famia ta manda pa nan, pero e ta un entrada di divisa importante pa e paisnan, cu ta caracterisa pa un escasez continuo di divisa.

Te luna di october e divisanan den forma di mandamento di placa pa yuda famia cu a drenta na Guatemala, El Salvador y Nicaragua a yega na un total di US$12.076 miyon.

E datonan pa e resto di e paisnan di e region (Honduras, Costa Rica y Panama) ta disponibel te cu juni di e aña aki y hunto a yega na US$2.546 miyon.

Guatemala ta e pais di e region cu mas recurso a ricibi na placa y ta esun cu e crecemento mas grandi (16.1%).

Na Nicaragua, e entrada di mandamento di placa pa famia a pasa di US$5.881 miyon entre januari y october 2016 pa US$6.825 miyon den e mesun periodo di e aña aki.

Mientras tanto, e mandamento di placa pa famia na El Salvador a alcansa US$4.112 miyon te october ultimo, lo cual ta supera cu 10.3%  e suma logra na 2016, di US$3.728 miyon.

Na Honduras, te cu prome seis luna di aña, e placa ricibi pa e famianan di e pais a yega na US$2.178 miyon,  13.2% mas cu den e mesun lapso di 2016 unda a registra US$1.924 miyon.

Costa Rica y Panama ta e paisnan cu ta ricibi menos placa, ya cu e paisnan ta receptor di mano di obra proveniente di e resto di e region.

Costa Rica a registra US$259,1 miyon te prome semester di 2017, mientras cu den e mesun lapso aña pasa a logra US$248,6 miyon. Den porcentahe e crecemento tabata 4,2%.

Panama tabata e unico pais cu a experimenta un reduccion den su entrada di mandamento di placa pa famia, di 47,3%, pasando di US$205,6 miyon pa US$ 108,4 miyon.

E placa ta ser uza pa e famianan cu ta ricibi nan, pa principalmente resolve gasto di alimentacion, educacion y mehoracion di vivienda.

42.9% di loke e hogarnan a ricibi na placa, ta ser uza pa satisface necesidad di  alimento y bebida,  28.4% pa educacion, solamente 1.1%  ta destina na actividad productivo, di acuerdo cu e tercer Informe di Coyuntura Economico di 2017, di e Fundacion Nicaragüense pa Desaroyo Economico y Social (Funides).