Mañan diahuebs, 25 di januari, ariba Dia di Betico ta bay tuma luga e apertura di un museo nobo, un museo dedica na resalta pintornan local y difuntonan cu tabata tin e pasion pa pinta. Den un entrevista cu pintor internacional Gustave Nouel, el a conta di unda e inspiracion a bin pa habri e museo aki y kico ta e meta tras di esaki.
Nouel a conta cu hunto cu e tin varios aña caba, hunto cu e rumannan Brown, ta purbando di haya un museo grandi local cu ta exhibi arte di tanto e difuntonan como di e artistanan grandi pa nan por mustra nan arte y tin e placer di comparti esaki cu e publico di Aruba prome cu nan muri.
Lastimamente nan no a logra yega na un luga grandi y seis luna nan a logra presenta nan iniciativa na un persona pa asina por logra habri e museo. “Nos a papia cu Susanita y e tabata drechando e cas y nos a propone un museo y el a hay’e un bon idea y di e tempo ey nos a cuminsa traha riba e museo,” el a conta.
Nouel ta famia di difunto Padu Lampe y el a invita Vivian Lampe, yiu di difunto Padu Lampe, tambe pa e bin acerca pa asina por presenta e arte di Padu den e museo nobo aki.
Rancho ta un di e barionan mas historico y alabes un di e barionan mas neglisha di Aruba. “Y nos ta spera cu e iniciativa aki por duna mas atencion pa rancho. P’esey nos ta invita henter pueblo di Aruba pa bin mira nan herencia.”
E museo nobo aki ta situa den Rancho, un di e barionan, Nouel a remarca, cu hopi monumento, casnan bieu, cas di piscado y diferente otro cos cu diferente pais mundo ta enfoca riba dje, den pasado. Pero na Aruba nan tine neglisha mientras cu nan por usa esey pa mustra e herencia na tanto e pueblo di Aruba como na e turistanan.
“P’esey nos a uni forsa. Pa mi ta un honor pa comparti e exposicion aki cu Padu cu ta e tata cultural di Aruba y manera mi a compronde for di hopi hende hubentud ta lubida cu nos tabatin un tata di cultura,” el a indica.
Nouel a agrega cu ademas di esey ta importante pa tin un museo mas grandi pa tur artista local por mustra nan obra na Aruba mes, pasobra aworaki, el a señala, no tin un museo pa mustra arte di artistanan contemporaneo.
“E museo aki tanto di artistanan contemporaneo como algun difunto. Diferente artista local a uni na e iniciativa y ta bay demostra nan arte durante e apertura di e museo aki dedica na artistanan local y cu lo resalta e cultura di Aruba,” el a subraya.
El a enfatisa cu tur e arte cu ta bay ser exhibi den e museo ta parti di e cultura di Aruba y tur cos cu ta den e museo aki ta inspira den cultura Arubano. Na mesun momento e ta un homenahe den cuadro di e celebracion di 200 aña di Oranjestad.
“Nos ta cuminsa cu algo chikito y despues ta crece bira algo mas grandi, pero por lo menos nos tin algo y si e museo demostra cu e por sigui nos por usa e mesun formula aki pa aplica esey tambe na museonan mas grandi,” Nouel a finalisa.
Vivian Lampe, yiu di difunto Padu Lampe, a splica cu su difunto tata ta conoci como compositor y pianista y tabata conoci como Padu del Caribe. Pero algo cu hopi hende no sa ta cu e tabata pintor tambe y ora e tabata pinta e ta bay bao di e nomber J.C. (Juan Chabal) Lampe.
Lampe a conta cu semper el a wak e ta pinta. Di tempo e tabata chikito ora e tabata bay cas, e tabata wak su tata sinta ta pinta. El a sigui conta cu su tata a cuminsa tempo e tabata hoben y te cu su casi 90 aña e tabata pinta ainda.
Segun Lampe a indica den su bida, Padu a pinta alrededor di 500 cuadra y den un buki special dedica na e arte di Padu, skirbi pa Stan Kuiperi, por mira tur e diferente pinturanan cu el a pinta.
“El a laga un historia, el a laga Aruba den su pinturanan pasobra loke el a pinta hopi di e cosnan ey no t’ey mas,” el a resalta.
Durante e apertura di e museo nobo aki ta bay tin alrededor di 10 pintura di J.C. Lampe. Niun di e pinturanan aki ta na benta, pero lo t’ey pa henter pueblo por mira. “E museo ta un regalo pa Rancho y pa Aruba,” Lampe a enfatisa.
Por ultimo tanto Nouel como Lampe a entende nan invitacion na pueblo di Aruba pa pasa bishita e museo nobo cu o habri oficialmente ariba Dia di Betico pa rindi homenahe na cultura di Aruba.
