Manera ta custumber Fundacion Contra Violencia Relacional (FCVR) ta organisa nan colecta riba caya pa recauda fondo pa asina cubri e gastonan di operacion di nan shelter di hende muhe, mucha, victima y sobreviviente di violencia domestico. Mañan diasabra 6 di juli ta ultimo dia di e colecta aki unda pueblo di Aruba tin oportunidad pa contribui y yuda e fundacion.
FCVR ta un fundacion cu ta existi pa mas di 25 aña. Hopi conoce e fundacion mas bien bou di e nomber di Fundacion pa Hende Muhe den Dificultad, pero algun aña pasa e nomber a cambia pa Fundacion Contra Violencia Relacional (FCVR).
E motibo pakico a cambia e nomber di e fundacion ta pasobra ora cu un persona scucha hende muhe den dificultad hopi biaha nan ta pensa cu e fundacion ta yuda solamente hende muhe, pero e fundacion kier a inclui e ser masculino tambe den e organisacion.
FCVR ta organisa algun biaha pa aña nan straatcollectie, colecta riba caya, pa asina purba recauda mas hopi fondo cu ta posibel pa por cubri e gastonan di operacionnan diario di e fundacion y esaki ta implica cubrimento di gastonan di awa, gasolin, coriente, cuminda y tur otro cos cu ta encera operacionnan diario.
E fundacion mes ta responsabel pa tur gasto cu tin di haber cu nan clientenan y esaki ta inclui cuminda, paña, gasolin entre otro cu ta cay den e servicio cu nan ta ofrece specialmente pa nan clientenan di ayudo residencial.
Algun aña atras e fundacion a habri mas camber pa e ayudo aki y esaki naturalmente a trece mas gasto pa e fundacion. A pesar cu e fundacion ta ricibi subsidio for di gobierno recaudacionnan di fondo ta necesario pa por caba di cubri tur gasto.
E fundacion ta depende di e generosidad di pueblo di Aruba cu por duna nan donacion sea di forma financiero of material tambe. Algun di e localidadnan clave caminda ta bay tin boluntarionan di FCVR colectando mañan diasabra ta entre otro brug di Renaissance, dilanti di Imelda Kleuterschool y algun otro rotonde rond di e isla.
Potretnan: pagina di Facebook di Fundacion Contra Violencia Relacional
