Mañan presupuesto complementario trata den Parlamento; Cambio den ley di Winstbelasting y Freezone aproba unanimamente

Ayera den tempo record a trata y aproba unanimamente dos cambio di ley den Parlamento. Ta trata di cambio haci den e ley di Winstbelasting y di Freezone, pa asina pais Aruba por cumpli cu normanan internacional.

E aprobacion di e cambionan aki a evita cu nos pais ta wordo poni riba lista preto pa falta di cumplimento di e compromiso adkiri cu institucion internacional di Organisacion pa Colaboracion y Desaroyo Economico (OESD).

E cambionan den e ley di Winstbelasting y di Freezone, hunto cu e tratamento di e presupuesto complementario mañan, lo ta e ultimo leynan cu ta wordo trata prome cu parlamento ta bay den reces e siman aki.

Winstbelasting.
Na final di e reunion publico aki, Minister di Finanzas y Economia, Xiomara Ruiz-Maduro a declara na Bon Dia Aruba cu e prome ley, esta Winstbelasting, ta dirigi pa e compania multinacional cu ta presente na Aruba. Cu e cambio implementa den e ley aki nan mester tin cierto documentacion adicional pa regla.

For di 2008 e multinacional estableci na Aruba tabatin obligacion di elabora riba cierto documentacion. Awor cu e cambio cu a keda introduci, e ley aki ta bira mas skerpi pa Aruba por cumpli cu e regla internacional pa evita evasion of iregularidad pa evita pago di belasting.

E mandatario a splica cu pa e multinacionalnan cu tin un entrada di mas cu 1.5 biyon, nan tin cu traha por ehempel un rapport di e pais di cual nan ta. Pero tambe un rapport di e grupo cu nan ta participa den dje, y tambe un rapport local. Nan ta tres tipo di reportahe cu cual nan mester cumpli.

“E idea di esaki ta pa e servicio di impuesto, unda e grupo aki ta activo, pa nan por tin informacion,” el a bisa. Asina e servicio di impuesto por mira si di berdad e compania multinacional no ta evita di paga belasting. Den e caso aki Winstbelasting of impuesto riba ganashi, pa nan no evita di paga nan. No solamente afo, pero tambe nos servicio di impuesto ta bay haya e informacion aki. E entrega di informacion y documentacion -segun e mandatario- ya caba tabata un practica di nan. Pero aworaki el a wordo ‘codifica’ pa cumpli cu e reglanan internacional.

Nan ta 15 regla pa evita evasion di impuesto cu Aruba a compromete su mes pa cumpli cune dilanti instancia internacional. Di e 15 reglanan aki, cuater ta esencial. Na inicio di e aña aki a wordo trata dos di nan, cu mester a aproba lihe den parlamento, ya cu pais Aruba a cay laat pa cumpli cune, y nos a wordo inclui riba e lista preto. Unabes cu e ley a caba di pasa, e instancia internacional a saca pais Aruba afo. “Nos ta traha duro, pero tin biaha tin cierto atraso ora ta trata e leynan necesario…,” Maduro a indica.

Sinembargo a keda dos regla pendiente, cu mester a trata y aproba prome cu fin di aña. Den esaki henter fraccion den Parlamento a duna su apoyo y aprobacion unanimamente ayera mainta. Di e forma aki pais Aruba ta cumpli cu e number 13. Pero tambe cu e number 5 di e reglanan cu ta concerni na freezone. Esaki tabata e tratamento y aprobacion cu a tuma luga den nos organo legislativo ayera.