Mañan Parlamento di Aruba ta trata ley di matrimonio pa pareha di mesun sexo

E topico di apertura di matrimonio pa pareha di mesun sexo na Aruba ta uno cu pa hopi tempo ta den discusion. Finalmente mañan diaranson 8 di mei Parlamento di Aruba ta bay tene un reunion publico na unda e parlamentarionan lo trata e topico aki y vota na fabor of contra di e ley aki.

E trayecto pa trata e ley aki den parlamento tabata uno largo. E trayecto a cuminsa dia 16 di december 2022, ora cu e ley di iniciativa a wordo entrega. Dia 15 di februari 2023 Raad van Advies a duna su conseho riba e concepto di ley y dia 24 di februari 2023 gobierno a bay den casacion.

Manera ta conoci e iniciativa di ley di matrimonio pa pareha di mesun sexo ta un iniciativa di fraccion RAIZ, MAS y ACCION21. Lider di fraccion RAIZ, parlamentario Misha Raymond, na mas di un ocasion a haci peticion na presidente di parlamento, Edgard Vrolijk, pa pone den agenda un reunion publico pa trata e iniciativa di ley aki. Hasta cu den su ultimo peticion el a expresa tambe kico e ta pensa ta tumando lugar y pakico e ley aki no a wordo yama ainda.

Despues di varios carta dirigi na presidente di parlamento di parti di parlamentario Raymond, diaranson 27 di maart, RAIZ a ricibi un carta for di presidente di parlamento cu tabata indica cu dia 8 di mei 2024 ta bay tuma lugar e reunion publico pa trata e ley di matrimonio pa pareha di mesun sexo.

Gobierno di Aruba ta en espera di e veredicto di Corte di Casacion, cual a stipula cu nan ta bay duna nan respuesta riba e caso dia 31 di mei. Fraccion RAIZ a indica cu nan ta contento cu dia 8 di mei no ta despues di casacion, pero mas cu tres siman prome pa asina por trata e ley aki den sala di parlamento.

E lider di fraccion RAIZ a subraya durante un conferencia di prensa dia 28 di maart cu esaki ta momento cu e debate politico por tuma lugar unda tur parlamentario por expresa nan mes, por bin cu nan puntonan y por expresa si nan ta na fabor of contra y nan por bay votacion.

“Esaki ta e momento cu mester tuma lugar. Nos ta papiando di hende, nos ta papiando di derecho di no wordo discrimina y e proceso no mester bay asina ki. E mester ta un proceso cu ta bay di tal forma cu nos ta duna honor na e derechonan cu nos ta bringando pe,” Raymond a subraya.