Ayera mainta Minister di Infrastructura, Desaroyo Teritorial y Medio Ambiente Otmar Oduber a informa tocante e ‘GroundBreaking’ di Hotel Secrets Baby Beach na Sero Colorado.
El a splica cu nan a cana un proceso largo durante e ultimo lunanan cu a pasa pa loke ta trata e formalisacion di tur permiso y documento cu finalmente hopi hende a duda cu esaki lo por tuma luga. Sinembargo, mañan dia 14 di november proximo lo cuminsa cu inauguracion concreto di e Grounbreaking y trabounan cu lo cuminsa di e hotel aki. Durante ultimo casi 40 aña cu diferente gobierno a papia di esaki, a realisa pa San Nicolas por tin un desaroyo nobo y turistico.
Di mesun manera, Oduber a comenta cu un pais cu ta depende 90% di industria turistico y un districto manera San Nicolas cu a keda asina hopi atras durante e ultimo trinta añanan, ta obvio y natural cu e caminda cu mester cana ta e caminda pa por desaroya e aspecto turistico den area aki.
Tambe a expresa cu combina cu e pensamento y e vision yama ‘Culture and Heritage City’ di Aruba y cu e posibilidad cu ta crea e movemento di volumen di hende den area. Gobierno a mira y a haya hopi interes pa inverti pariba di isla. “Ora cu tuma nota di e raportnan di Central Bureau of Statistics (CBS) ta mira cu San Nicolas ta e bario for di cual mas hende a sali pa bay biba na otro parti di Aruba. Tambe ta mira den e rapportnan di CBS y di labor, cu San Nicolas y bisindario tin e cantidad di desempleo di mas halto riba nos isla. Cu e desaroyonan cu ta na caminda, hende di pariba tin e opcion pa traha mas cerca di nan cas”, segun un comunicado di gobierno.
Diahuebs awo, Grupo Martinon lo brinda un celebracion tambe pa henter comunidad den Carnival Village diahuebs anochi dia 14 di november. Segun gobierno, ta un actividad di gradicimento di e grupo na comunidad.
