Desde e prome actividad di Baki den Bario, esaki a bira hopi popular den comunidad. Despues di e ciere di dump na Parkietenbos hopi hende tabatin dificultad pa tira nan desperdicio afo y consecuentemente a cuminsa deshaci di esaki den naturalesa y asina dumpnan ilegal tabata nace.

Cu Baki den Bario ciudadanonan tin oportunidad di deshaci di nan desperdicio di un forma responsabel, pero a pesar di esaki, e problema di sushi rond di e isla ta keda un grandi y preocupante.

Baki den Bario ta un iniciativa cu ta forma parti di e campaña Limpi Limpi di gobierno. Parti di e meta di campaña aki ta pa conscientisa e ciudadanonan ariba e procesamento responsabel di desperdicio.

Baki den Bario a inicia den luna di september 2023 y a cuminsa aceptando cinco diferente tipo di desperdicio basa riba e tiponan di desperdicio cu mas frecuentemente ciudadanonan tabata hiba dump na Parkietenbos.

Despues di e prome actividad a tuma decision pa pone baki apart pa taira y carton, a cuminsa acepta azeta di cushina usa y a cambia e orario pa un ora mas prome, for 7or di mainta te cu 11or di mainta.

Mester remarca cu Baki den Bario no ta habri pa desperdicio comercial, solamente desperdicio residencial y no ta acepta asbestos tampoco. Na algun ocasion a bin encontra asbestos, cual ta inaceptabel.

Pero a pesar di e esfuersonan aki, hopi ciudadano ta sigui deshaci di nan desperdicio di un forma ilegal. Ta benta esakinan unda cu ta, of ta benta esaki den bakinan di otro hende, cual a yega di wordo denuncia ariba plataformanan social na varios ocasion.

A traves di e plataforma FIXI tambe ciudadanonan por haci melding, cual ta yega directamente na Bureau City Inspector (BCI). Den luna di juni BCI tabata basta activo y a publica riba nan pagina di Facebook tocante varios melding cu nan ricibi pa dumpnan ilegal na diferente parti.

Na su turno BCI ta haci e trabou di limpiesa y na mesun momento ta busca informacion pa haya sa ken por ta e persona(nan) responsabel pa deshaci di nan desperdicio di e forma ilegal aki y e persona(nan) aki por ricibi boet halto.

E situacion ta alarmante y preocupante. No solamente esaki ta dañino pa naturalesa, pero esaki ta un mahos bista y ta duna un mal impresion pa e turistanan cu ta bishita Aruba.

Mañan e siguiente actividad di Baki den Bario ta tuma luga patras di Colegio Ora Ubao y ta recorda tur ciudadano cu kier deshaci di nan desperdicio durante e actividad aki cu e sushi mester ta separa segun e tiponan di sushi cu ta ser acepta.

Potretnan: Facebook Bureau City Inspector