Mañan ta conmemora Dia Internacional di Lenga Materno. Pa presidente di Fundacion Lanta Papiamento (FLP), Eduard Pieters a wordo registra logronan importante pa consolida nos idioma materno, manera e oficialisacion di Papiamento banda di Hulandes.

Pero te ainda tin asunto concerni pa salvaguardia nos lenga materno, manera e creacion di un instituto linguistico Arubano, cu no a bira realidad.

Instituto linguistico

Pierters a elogia cu actualmente tin un conscientisacion den e comunidad cu ta papia Papiamento riba su uso, pero e por miho. For di tempo cu el a tuma presidencia di FLP, un aspecto cu por yuda pa miho ta e necesidad di un instituto linguistico nacional. Un instituto di e caliber aki su importancia ta cu nan por sigui desaroyo di Papiamento.

Pa ilustra un poco riba importancia di un instituto asina, el a trece como ehempel cu awendia no tin un control riba hendenan cu ta duna curso di Papiamento. E ta respeta e hendenan cu ta duna curso, pero e ta haya cu bo mester tin un tipo di acreditacion pa haci e tipo di curso aki a base di un preparacion academico na nivel halto. Actualmente no tin un instancia pa controla esaki.

E situacion aki ta conta pa e islanan ABC, caminda nos mester di un tipo di instituto linguistico cu ta sigui trabaonan pa desaroyo di nos idioma. Pero tambe desaroyo di materialnan na Papiamento. Mientras cu nos por wak paisnan den exterior cu si tin un instituto linguistico.

A pesar cu nos ta haciendo basta caba, pero e ta haya cu ainda falta mas pa hisa calidad di Papiamento na Aruba. Y e falta di un instituto linguistico por bira un menasa pa nos Papiamento.

Presidente di FPL a declara na Bon Dia Aruba cu e preocupacion aki a wordo canalisa debidamente na instancia gubernamental. Ya cu gobierno di un pais mester ta envolvi den un proceso asina. “E ta ilogico cu un gobierno a bira lomba pa algo asina,” el a declara.

Pieters por bisa tambe cu riba tereno di enseñansa den e Plan Educacion Nacional (PEN) ta para e asunto di un instituto linguistico. Te hasta e ta aparece riba e website di enseñansa Aruba (www.ea.aw), caminda bo ta haya e plan aki (PEN) caminda ta wordo menciona un punto strategico of punto di lansa cu ta trata e formacion di e instituto linguistico.

Como fundacion nan lo sigui den combersacion y sigui presiona di un forma positivo pa e instituto linguistico Arubano por bira realidad. E ta lamenta cu ainda nan no a logra, ya cu tin diferente motibo, entre nan financiero.

Menasa

Un menasa no solamente pa Papiamento, sino pa cualkier idioma ta e uso mundial di idioma Ingles. Te hasta tin pais cu nan idioma ta adoptando hopi palabra for di Ingles.

El a agrega cu riba e punto aki tin discusion, ya cu tin linguistanan cu ta consider’e bon y nan ta mir’e como un desaroyo, pasobra lenga ta algo dinamico. Pero otronan ta hay’e menos positivo pasobra bo lenga materno ta core e risico pa disparce.

El a bisa cu como pedagogo e ta aprecia cu nos hende ta multilingual. Pero nos mester ta realistico cu Ingles ta tumando parti di nos idioma cu nos ta papia diariamente.

Actividad

Presidente di FLP a bisa cu Dia Internacional di Lenga Materno ta un fecha importante pa cualkier pais, specialmente pa un pais cu ta sali na vanguardia di su idioma y ta preserva su cultura. Nan ta elogia y balora e hecho cu UNESCO a yega di proclama e fecha 21 di februari como Dia Internacional di Lenga Materno.

Pa nan como fundacion ta un oportunidad pa dedica special atencion na nos lenga materno. Pero esaki no ta kita cu como boluntario di e fundacion aki, nan ta dedica tur dia riba e preservacion, desaroyo y status di nos idioma Papiamento.

P’esey pa duna contenido na e fecha internacional di mañan for di 13.30 pa 15.30 ora local, FLP ta organisa un conferencia virtual internacional transmiti via Meet.Google y Diario TV (canal 48) cu participacion di Hulanda, Corsou y Bonaire cu tambe ta luchando pa un status miho di Papiamento den comunidad di nos lenga materno.

E titulo di e conferencia ta: “E Balor di Nos Papiamento,” y e ta algo varia cu charla, video, entrevista, canto, declamacion y te hasta wega haiku. Esun interesa pa haya mas informacion di haiku, bo por consulta libremente e Pagina di Facebook di fundacion lanta papiamento flp.