Ayera mainta durante un conferencia di prensa di Gobierno di Aruba, prome minister Evelyn Wever-Croes a trece dilanti un actualisacion di e situacion Covid-19 na Aruba y alabes a anuncia cu mañan ta cumpli un aña cu a registra e prome dos caso.

Ta importante pa recorda cu mañan 13 di maart ta cumpli un aña cu Covid-19 a yega na Aruba y tur loke pais y comunidad a pasa aden. Pa e motibo aki ta organisando un ceremonia dirigi pa cada un di e personanan cu a fayece pa via di e malesa aki. Mañan for 6or di atardi lo tin un ofrenda floral dilanti Bestuurskantoor y 7or di anochi lo tin un programa special na TV.

Igualmente, Wever-Croes a recorda cu ora pandemia a cuminsa a tuma e decision di cera e frontera di e pais pa mas di tres luna, ademas di impone medidanan pa evita mas plamamento di e virus. A cambia e strategia di aplicacion di test na unda a bira mas agresivo pa test mas hende y asina por constata e malesa aki mas lihe.

E medidanan practicamente tabata mas pisa cu loke comunidad por a mira den historia di Aruba, pero segun prome minister, danki na e strategia agresivo aki, a logra contene e situacion y esey a permiti pa prepara tambe pa loke tabata bin.

A introduci compensacionnan financiero pa por evita cu hopi compania bay den bancarota y evita retiro di trahadonan. A introduci subsidio di salario e cual pa aña pasa a cuminsa yuda 25.000 hende y te awe ainda tin 18.000 trahado den sector priva cu ta depende di e subsidio di salario aki.

Igualmente a introduci un asistencia financiero pa esunnan cu a perde nan trabao, loke nan ta yama FASE. Y aña pasa 11.650 persona a depende di e subsidio aki.

Tambe Wever-Croes a sigura cu a yuda empresanan mediano y chikito, cu ta e “weso di lomba di nos economia” y pa cu esaki, el a bisa cu a duna un sosten adicional di 4.000 florin pa kwartaal pa asina por cubri otro gastonan cu no ta solamente salario. 2.500 compania ta haciendo uso di esaki.

Banda di esaki a haci inyeccionnan financiero na SVb y AZV pa e fondonan no kibra y bay den bancarota.

Di e medidanan cu Gobierno a tuma, prome minister a comenta cu esey tabata pa evita movecion di hende y asina evita cu e virus por a sigui plama lihe. E meta final tabata pa percura pa no pone capacidad di hospital poni bao di presion. “Tanten cu nos tin capacidad den hospital, sea den sala B-3, den otro salanan of Cuido Intensivo, nos tabata sinti cu nos tabatin e situacion bao di control”, el a declara.

Igualmente e capacidad di cuido intensivo a wordo aumenta, ‘just in case’ manera el a manifesta.

Medidanan a pone cu tur hende mester a keda paden, den cas, pa purba di mitiga e resistencia of panico cu tabatin door di esey, alabes pa splica tur hende cu no ta sinti nan mes cera pa den sino pa keda safe den cas.

El a menciona e disciplina cu henter crisis team a bin papiando tur luna pa comunidad por cuida su mes y cu awe te ainda esey ta e yabi principal den e lucha contra Covid-19.

Den aña aki, prome minister a bisa cu Aruba a mira tres ola di e pandemia cu a cuminsa na maart di 2020 cu tabatin 101 caso registra y na luna di mei a yega na 0 caso activo, nan a dicidi di flexibilisa e medidanan, habri scolnan, habri frontera y 1 di juli a habri e frontera cu Merca -un di e paisnan mas afecta pa e pandemia- na unda el a sigura cu economia a cuminsa rebiba, turistanan a cuminsa bin Aruba, no igualmente pero Aruba tabata atende nan cu hopi protocol.

Na augustus di 2020 a naci un brote den e ‘nigthlife’ di Aruba y di e manera ey e segundo ola a cuminsa, esaki a registra un pik di 1.600 caso activo na unda a bolbe introduci medidanan di toque de queda pero e biaha aki nan no a implementa e shelter in place y scolnan a keda habri, pa motibo cu protocolnan tabata na luga y segun prome minister a afirma, “tur hende a custuma cu e idea y reglanan cu mester tin”.

Pa fin di aña e casonan a cuminsa subi back, algun hendenan a laga e disciplina y na januari a presenta e di tres ola, cu a yega na su pik cu 624 caso dia 13 di januari, na e momentonan aki e isla ta saliendo for di esaki.