Mañan Conseho di Ministro di Reino y Prome Ministro di Aruba lo discuti implementacion di dos ley di Reino (rijkswet), cu ta condicion pa Aruba ricibi sosten di Hulanda. No solamente sosten financiero, pero tambe asistencia pa yuda reforma economia di Aruba pa haci esaki mas resiliente.
Prome Ministro Evelyn Wever Croes a biaha pa Hulanda ayera, despues cu dialuna pasa un mayoria den Parlamento a dun’e un aprobacion pa yega na e acuerdo cu Hulanda.
E ta encera acepta cu e supervision financiero ta bay cay bao di un rijkswet envez di un ley Arubano, y un rijkswet pa implementacion di un pakete di reforma y recuperacion pa Aruba, cu ta bay ta ehecuta pa un entidad independiente Hulandes, a base di deliberacion cu Gobierno y Parlamento di Aruba.
Prome Ministro Wever Croes na su salida a bisa cu “Despues di varios luna di negociacion cu Hulanda nos a yega na un punto cu Gobierno di Aruba ta cla pa acepta e condicionnan.”
Pa e motibo aki Prome Ministro Evelyn Wever Croes a biaha pa Hulanda pa atende e reunion di Conseho di Ministro di Reino dia 13 di november durante cual lo trata e tema.
“Nos ta kere cu e pakete cu tin riba mesa awor ta mas balancea, particularmente pasobra a tene cuenta cu autonomia di Aruba, cu ta keda salvaguardia. Y mas ainda, e pakete lo yuda Aruba pa sali di tur e problemanan cu e pais a haya su mes aden pa motibo di Covid 19.”
Wever Croes a bisa cu Covid a dal Aruba duro y a pone e pais dal un paso atras. “Aworaki, cu e areglo aki, cu e acuerdo aki y e financiamento y e sosten di Hulanda, nos ta cla pa dal pasonan grandi dilanti pa sali mas fuerte, cu un Aruba mas fuerte, un economia mas fuerte y un autonomia mas fuerte,” tabata e palabranan di Wever Croes ayera tardi.
