Importancia di libertad ta cu no ta trata di un concepto so, sino di un manera di accion y di pensamento, libertad ta basa den respet pa otro hende y pa e persona mes.
Libertad ta concedi como un derecho humano fundamental di e personanan, referi na facultad di individuonan pa eligi nan manera di biba, di pensa y di actua den e sociedad di un manera responsabel, sin obligacionnan.
E celebracion aki tin relacion cu algun hechonan relevante cu a sucede na nomber di libertad, venciendo sclavitud y opresion.
Esaki por ta un di e derecho mas importante di bida, ta p’esey cu ta merece un dia pa celebr’e, den caso aki, cada 23 di januari ta recorda Dia Mundial di Libertad, pero pa ki motibo e ta ser conmemora?
Esaki ta pa motibo cu un 23 di januari na 1954 na Taiwan, aproximadamente 22.000 prizonero di guera, soldaatnan di ehercito Comunista Chines y Koreano cu tabata deteni no tabata kier bay back na nan pais ya cu nan tabata busca nan libertad. Den un trabou conhunto na Korea nan a logra nan libertad.
Coincidencia di destino, un hecho importante tambe a sucede e mesun dia pero na aña 1958 na Venezuela ora e pueblo a lanta contra e dictadura militar di Juan Vicente Gomez cu tabatin na e pais aki.
Acontecimentonan manera esakinan a demostra cu no ta posibel alivia of elimina e confrontacion entre sclavitud bao comunismo y libertad bao democracia por medio di negociacionnan. Di otro banda e situacion actual na mundo a move e pueblonan pa lanta di e menasa di comunismo, por lo tanto e desaroyo lihe di Movemento di Dia Mundial di Libertad ta un forsa natural cu ta crece den e tempo.
Opcion y capacidad di eligi ta algo hopi aprecia, tin libertad di decision ta un desafio cu ta implica di ta responsabel, pero tambe mester di balor y curashi.
Mas importante ta pa tene na cuenta cu libertad mester ta basa tambe den respet pa otro hende, pero principalmente pa nos mes. Ta liber mester ta un derecho di tur ser humano, tuma accion cu responsabilidad ora nos tin’e tambe ta importante.
E libertad ta yega na personanan a traves di:
– Musica: cu ta un forma di comunicacion y di identificacion di tur ser humano. Pa e motibo ey, historicamente musica ta ser usa como un arma den defensa di e libertad.
– Literatura: Ta e paspoort pa drenta den un bida mas amplio, den e zona di libertad. Literatura ta libertad specialmente awor cu balornan pa lesa ta ser desafia hopi.
– Ciencia: E duda, observacion, medicion, rasonamento, contraste di ideanan ta atributonan di sociedadnan liber y di studio cientifico. P’esey libertad y ciencia ta compañero y ta complementa otro.
– Naturalesa: Entorno fisico den cual personanan ta move, esun cu nan ta cuida y ta protege y no ta imprescidible. Ta e limite y e marco di e libertad. Personanan ta busca pa ampli’e modific’e, mehor’e, incluso hasta destrui’e, pero e naturalesa ey ta indiferente na accion di personanan y ta garantisa e libertad.
E dia aki ta pa reflexiona y celebra un ocasion di gloria cu ta simbolisa e triunfo di libertad riba sclavitud, a bira un candela di speransa pa pueblonan cu te ainda ta busca nan libertad, ademas ta un señal di luz pa mundo henter dedica na libertad.
