SIMAR a tuma nota di e comunicado di Minister di Enseñansa y ta di lamenta cu e ta purba di difama su propio empleadonan atrobe insinuando cu Managernan a perde e interes general for di bista, mientras cu desde e prome reunion cu su persona desde cu e welga a cuminsa, managernan a enfatisa cu nan ta desea pa yega na un areglo mas lihe cu ta posibel pa por reanuda trabou.
E ta menciona cu a presenta diferente solucion pa “satisface” managernan, mientras cu aki no ta trata di satisfaccion sino pa derecho di e empleadonan. Manera den tur negociacion sano, partidonan ta presenta nan proposicionnan cu meta pa yega na un acuerdo, cu ta loke e managernan a haci te cu 24 di augustus. en cambio no a ricibi ningun contesta riba esaki for di Minister. Pues no por bisa cu no tabata tin boluntad di Managernan pa yega na solucion.
Di e 5 asina yama exigencianan, cu mas bien ta peticion, en berdad Minister a honra 4, pero mester enfatisa cu esun principal, cual ta pa nombra un di tres manager, no a ser honra! Esaki ta e peticion principal. En cambio Minister ta reconoce e necesidad di e tercer persona, ofreciendo oranan pa docentenan sostene e managernan den nan tarea. Esaki no ta responsabel ni practico ya cu un manager tin e autoridad pa tuma decision, mientras un docente cu “taakuren” ( oranan pa eherce tareanan di scol) no lo tin.
Minister a propone pa e managernan warda pa 4 luna pa e laga haci un investigacion. Mesun promesa cu a ser haci un aña y mey pasa. E mesun investigacion cu mester a cuminsa masha tempo pasa pa cu e trabounan di implementacion di restructuracion di salario, cu ya a ser posponi pa mita aña y ta premira cu lo no ser implementa dia 1 di januari 2017 tampoco. Pues managernan no por bay asumi cu pa aki 4 luna lo tin solucion pa loke ta nan derecho cu a bira un problema. Por cierto e asunto di “functiehuis” y restructuracion ta trata di futuro, managernan ta pidiendo pa solucion pa e situacion actual, cu pa nan a yega na un punto inaceptabel ya cu e peso di trabou di tres persona, ehecuta pa solamente dos a yega na afecta e empleadonan aki fisicamente y mentalmente.
Mientrastanto un caso sumario a ser entama cu meta pa manda managernan reanuda trabou. Mester remarca cu esaki ta muestra cu ta reconoce cu e presencia di e manager na pia di trabou ta importante pa funcionamento optimal, eficiente y cualitativo di Colegio EPI. SIMAR ta convenci cu lo yega na un solucion satisfactorio pa medio di e caso aki pa asina tur cos por normalisa na Colegio EPI, cu tabata e meta cu a ser vocifera desde e prome dia cu a reuni cu Minister.
Minister ta remarca cu e posicion actual di Managernan ta perhudicando e docente, studiantenan y e organisacion den su totalidad, mientras cu SIMAR ta di opinion cu e solucion ta den man di Minister!
