Natasha Joelle Silva ta e manager general nobo di Parke Nacional Arikok entrante 1 di november.
Esaki e fundacion di e parke ta informa.
Segun nan relato Hunta di Directiva a firma contract cu sra. Silva pa e funccion. “Cu esaki Hunta di Directiva ta kere cu lo drenta un era di stabilidad nobo na nos parke nacional. Natasha ta un persona cu tin curazon pa Aruba y pa naturalesa y a traha pa diferente organisashon cu ta salvaguardia interes di naturalesa y cu ta informa communidad encuanto e importancia di naturalesa pa communidad humano.” E director anterior Emil ter Horst a bay den un ambiente controversial. E directiva a kita sr. Ter Horst pa motibo cu segun nan e no ta cumpli cu e tareanan stipula di directiva. E caso a bay na corte unda hues a conclui cu no tin confiansa mes entre e partidonan y asina e retiro tabata un decision corecto. Sinembargo sr. Ter Horst a lanta un otro caso pa mustra e incompetencia di e directiva y specialmente e presidente Greg Peterson.
E fundacion ta duna mas detaye di e manager nobo:
“Natasha ta bin di un famia cu ta stima naturalesa y durante su niñes e tabata pasa tur su tempo den naturalesa. Asina aki a nace su pasion pa bestia y naturalesa, despues pa ecologia y conservacion di naturalesa.
P’esey su pasion no solamente ta haña nan bek den su estudio pero tambe den su trabow. Den pasado Natasha a eherce varios funcion den maneho y directiva di entre otro “Artis Amsterdam Zoo”, “International Zoo Educators Association(IZE)”, Instituut voor natuurreducatie en duurzaamheid(IVN)” y “Vogelpark Avifauna”. Ademas e la traha varios aña den directiva di educacion innovativo.
Den e funcionnan aki Natasha a duna guia na profesional y tambe voluntario, y e tabata traha como “project manager” riba diferente nivel cu teamnan multidisciplinario y e tabata responsabel pa trayectonan di cambio complica.
Ademas e tin amplio experiencia cu construi y mantene rednan y comercio. Pa tur funcion cu Natasha a eherce e ta pone tur su alma y curason den dje, no teniendo cuenta cu naturalesa so, sino tambe pa e ser humano cu e ta traha cu ne.
Natasha ta naci na Aruba unda ela biba te cu su 8 aña. Durante su temporada di scol e a biba prome na Bahamas, y despues na Inglatera. Despues e a sigui su educacion avansa na Hulanda. Ora di termina tres estudio, e por yama su mes, antropologo cultural, museologo y docente di biologia cu specialisacion den durabilidad, ecologia y desaroyo.
Durante su temporada como studiante e a topa cu su casa economista Remco Liem. Hunto nan tin un yiu homber y un yiu muher den edad di scol basico.
Famia Liem-Silva ta stima naturalesa y descubri mundo. Hunto nan ta pasa varios vacacion activo den naturalesa na varios continente. Nan tabata bishita famia y amistadnan na Aruba y naturalmente Parke Nacional Arikok!”
