(AP) – Banda di pop-rock Mexicano Maná a kita su colaboracion di aña 2016 cu Nicky Jam despues cu e cantante di reggaeton di Puerto Rico a expresa su sosten pa e candidato Republicano Donald Trump.
“Maná no ta traha cu racistanan,” e grupo a expresa cu un publicacion riba Instagram, unda a splica tambe e decision di kita “De pies a cabeza” for di plataformanan online. E cantica ta un remix di e original den 1992 cu ta inclui den Maná su album clasico “¿Dónde jugarán los niños?”
“Pa e ultimo 30 aña Maná a ostene y defende e derecho di Latinonan rond di mundo. No tin negoshi ni promocion cu ta bal mas cu e dignidad di nos hendenan,” e band a skirbi riba Instagram.
Jam, conoci pa su cancionnan manera “Travesuras,” “Voy a Beber” y e colaboracion cu J Balvin “X”, a expresa su sosten a Trump diabierna ultimo na un mitin cu a tuma luga na Las Vegas. Ora cu el a introduci e cantante, Trump aparentemente a confundi e cantante pa un muhe: “Super strea di musica Latino Nicky Jam! Bo conoce Nicky, e ta ‘hot’. Unda Nicky?” el a bisa.
A pesar di e confusion, Jam a expresa placer ora di conoce Trump, ken desde su prome campana presidencial a priminti cerca e frontera y implementa un mensahe fuerte anti-inmigracion.
Maná tin mas di dos decada ta expresa sosten na e causa di migrantenan na Merca. Den 2018, despues di a ricibi Latin Recording Academy’s Person of the Year Award, nan vocalista Fher Olvera a priminti: “Nos lo sigui lucha pa e derechonan di migrantenan cu a haci e pais aki grandioso; den e ultimo siglo, nan tabata e diferencia pa e pais aki por ta loke e ta awo.”
Un representante di Jam no a responde na The Associated Press su peticion pa comentario, mientras cu un representante di e banda a confirma e declaracion haci pero no a duna mas detaye.
Funda na Jalisco, Mexico, Mana a gana 6 Latin Grammy yy 4 Grammy ademas di ta un di e bandanan mas influyente na Latino America. Tambe e tin un strea riba Hollywood Walk of Fame.
Ademas di Mana, un lista largo di artista a pidi pa nan musica no ser asocia na ni usa pa Trump, incluyendo ABBA, The White Stripes, Celine Dion, Bruce Springsteen, Rihanna, Phil Collins, Pharrell, R.E.M. y Guns N’ Roses.
