Mama no ta autorisa yiu di 3 aña participa den estudio di anticuerpo

Algun dia atras, Departamento di Salubridad Publico (DVG) a informa comunidad di un investigacion cu nan a inicia entre e poblacion pa loke ta trata propagacion di coronavirus nobo y denomina Covid-19.

Tocante esaki, Bon Dia Aruba a tuma contacto cu un persona cu ta prefera di laga su nomber anonimo y cu a expresa su molester pa e investigacion aki. E molester a surgi na momento cu el a ricibi un carta for di director di Departamento di Salubridad Publico den cual nan a duna di conoce cu nan kier haci e estudio aki tumando muestranan di sanger di su yiu muhe di tres aña.

Un parti di e carta ta regarda lo siguiente: “A selecta arbitrariamente e persona pa participa na encuesta. Na e adres aki, tin un persona di edad cu ta den categoria ≤12 ken a wordo selecciona pa participa na e investigacion.”

Nan a menciona cu e proposito di e investigacion ta pa colecta informacion di anticuerpo den sanger di hende y cu esey lo yuda nan pa compronde mas tocante proteccion contra e virus.

E persona entrevista a señala cu e no ta contra di e investigacion, al contrario, ta bon pa trece dilanti algun informacion necesario pa comunidad y expertonan den area di salud. El a bisa cu “mi no ta contra di investigacion, pero dicon nan a scoge mi yiu chikito?”

Igualmente, el a laga sa cu e no ta di acuerdo pa su yiu participa den e investigacion aki pa motibo cu e no ta bay expone su yiu na un estudio cu ta trata di tuma dos muestra di sanger for di dje. “Kisas otro mayornan lo por ta di acuerdo pa nan yiu forma parti di un experimento, pero esun di mi no. Tin basta hende na Aruba pa por scoge pa haci esaki y cu por ta dispuesto pa colabora. Pero mi no ta di acuerdo pa muchanan chikito participa den esaki”, e persona aki a comenta.

Den e carta menciona tambe DVG ta informa riba e desbentaha y bentaha cu esaki por tin. Ta importante pa por tuma den consideracion tur bentaha y e posibel desbentaha prome cu e persona tuma e decision pa participa. Segun e carta, un di e bentahanan ta cu e persona por haya sa si el a yega di infecta cu Covid-19.

Ademas, ta señala cu e participacion pa esaki ta boluntario, si e persona no ta desea di participa no mester haci nada cu e peticion ey.

Tocante confidencialidad di datonan di e persona pa e estudio aki, nan ta papia tocante informacion manera number di telefon, adres, fecha di nacemento y informacion tocante estado di salud di e participante. Coleccion, analisis y wardamento di informacion ta necesario pa por contesta e preguntanan di investigacion y pa por publica e resultadonan di e investigacion. For di rapport y publicacion di e estudio lo no por saca afo informacion personal di e participante.

DVG lo warda e datonan y muestranan biologico pa un maximo di dies aña despues cu e investigacion finalisa y cu e persona a duna permiso pa esaki den e formulario di consentimento. Ademas, LabHOH ta sigura bao risico medico, segun loke e carta ta bisa.

Tampoco lo tin un compensacion pa participa den investigacion aki.

Di mesun manera, por a mira riba rednan social cu algun persona den comunidad tambe a duna di conoce nan molester pa loke ta trata vacunacion. Por ehemplo, un persona a publica cu el a haya un yamada for di e cas di cuido na unda su mama ta kedando, durante cual a puntra si e ta di acuerdo pa por usa su mama como un ‘test subject’ pa e vacuna contra Covid-19.

Tocante esaki, e persona su reaccion tabata basta negativo y a expresa: “Mi no sa ken den gobierno a bin cu idea ey, pero si bo kier sa si e ta traha bon, bay test riba bo mes y no mi mama of nos anciano.”

E post aki a trece diferente comentario y reaccion di comunidad na unda por laga sa cu hopi hende no ta di acuerdo cu test vacuna riba hendenan grandi.

Na diferente pais, un di nan Noruega, 23 persona cu tabata pertenece pa tercera edad a muri te dia 14 di januari di e aña aki. Agencia Noruego di Medicamento a asocia esaki cu e vacuna contra Covid-19 fabrica pa Pfizer-BioNtech.

E agencia aki, cu ta regula medicina na e pais en cuestion (Statens Legemiddelverk Norway), a adverti cu personanan mayor di 80 aña y esunnan cu tin otro malesanan por ta den riesgo di sufri efectonan secundario fatal despues dia wordo vacuna contra Covid-19, segun loke un corant di Noruega, The Local Norway a anuncia.

Di e fayecidonan, a evalua 13 pashent cu a muri despues cu nan a wordo vacuna. Expertonan a yega na e conclusion cu efectonan secundario asocia cu e vacuna lo por a contribui cu reaccionnan grave pa e pashentnan “debil y ancianonan”.

Te awor, autoridadnan sanitario di Noruega ta e prome na mundo cu ta realisa un yamada pa ‘cautela’ y ta lansa un advertencia riba e vacuna contra Covid-19, den caso aki, esun cu a wordo fabrica pa e sociedad Aleman-Mericano, Pfizer-BioNtech.

Na Aruba den dianan aki a wordo informa riba plan di vacunacion contra Covid-19, cu ta cla caba y disponibel pa comunidad. Asina tambe Departamento di Salubridad Publico a publica riba rednan social kico ta e pensamento di comunidad tocante esaki. Pero, ta keda na cada persona si ta di acuerdo pa haya e vacuna of no.