(TMZ) – Mama di un di e victimanan di Jeffrey Dahmer ta furioso cu Evan Peters a gana un Golden Globe pa e trabao cu el a haci interpretando e asesino riba Netflix, bisando cu e mester a duna tributo na e victimanan.
Shirley, mama di un di e victimanan di Dahmer Tony Hughes, a conta TMZ cu Evan mester a usa su speech pa menciona e famianan cu te ainda ta sufriendo pa causa di ‘Dahmer su crimennan, of pa bisa cu Hollywood mester pone un fin na conta storianan di e asesinonan aki y di e manera aki genera fanaticonan pa nan.
Evan Peters a gana e Golden Globe pa Best Actor in a Limited or Anthology Series pa su trabao interpretando e asesino Jeffrey Dahmer den e miniserie di Netflix titula “Dahmer – Monster: The Jeffrey Dahmer Story” y den su speech, el a bisa e audiencia cu e ta spera cu algo bon lo sali for di e victoria aki y e serie aki.
Shirley a critica esaki, bisando cu nada bon lo sali for di Evan su premiacion ni tampoco e serie di Netflix. El a bisa cu esaki solamente ta agrega na e sufrimento y dolor cu e famia di e victimanan di Dahmer ta sinti, bibando e tragedia aki un biaha mas.
Tony su mama tambe a comenta cu “tin hopi hende ken su cabes no ta bon rond di mundo y personanan ganando un premio pa nan rol den interpreta e asesinonan aki ta mantene e obsesion aki bibo y ta haci e hendenan aki beneficia di e fama.”
Tambe den su speech, Evan a menciona con dificil e tabata pa graba e serie aki, sinembargo Shirley ta cuestiona dicon el a acepta e rol na prome luga. E ta bisa cu e no mester a hunga e rol pa respet na e famianan cu te ainda ta biba cu e dolor di e perdida di nan ser keri.
Shirley a clausura su comentario bisando cu “e ta tristo con hendenan por tuma nos tragedia y genera ganashi cu esaki. E victimanan nunca a ricibi un cent. Nos ta sinti e dolor y emocionnan aki tur dia.”
