“Mare mi por a bay bek den tempo cu mi tabata bay scol basico cu e durf cu mi tin awo pa desmenti hende nan manera di husga mi. Bo no por bisa mi kico mi ta. Mi ta Colombiano, mi ta Arubiano, ma nace na Aruba, ma crece cu boso, mi mayornan ta di Colombia y mi ta bay biba como Colombiano y Arubano”, palabranan di Gloria Malvido Carrillo
Relaciona cu Bon Dia su edicion di 18 di maart unda nos ta enfoca riba Rubianonan nobo, nos a papia cu un par di hobennan di descendencia Latino/Colombiano pero tambe Chines, pa haya sa nan perspectiva creciendo na Aruba manera Rubiano cu mayornan inmigrante. Loke a resalta ta cu hopi hobennan a experiencia un tipo di discriminacion. Pero nan tambe a haya dificil pa haya un brug entre nan identidad Arubano y di nan descendencia.
Entre Rubiano cu Colombiano, niun di dos
Gloria Malvido Carrillo a nace y crece na Aruba cu mayornan cu a bin di Colombia. E ta conta Bon Dia con su mayornan a conoce otro na Aruba, tempo cu ambos tabata traha den sector di limpiesa. “Nan tabata bay enseñansa pa empleo y djey despues di conoce otro nan a casa despues di un tempo. Mi mama a bin Aruba cu ayudo di un famia di Santa Cruz cu basicamente a adopt’e y a bis’e nan ta bira su mayornan na Aruba. Nan tabata yuda otro hopi.”
E tempo ey sra. Malvido ta pinta cu simpleza pa haya permiso y trabou generalmente na Aruba, compara cu awendia. “Mi famia e tempo ey a haya permiso via Nel Oduber.” Aunke e gesto di solidaridad bou seno di famia pa e hoben tabata presente, na scol esaki tabata ful diferente. Aunke e no tabata haya cu tabatin termento pisa riba dje, nunca e por a identifica cu niun di dos di su descendencianan. Esaki debido na manera con e tabata tende constantemente cosnan manera ‘bay bek bo pais’. El a dal duro pe ora e tabata bisa cu e tabata Rubiano y nan tabata nenga esaki di tur banda.
Interesante ta cu segun sra. Malvido, pasobra e tabata constantemente purbando di asimila cu cultura Rubiano, e tabata rechasa pa hopi tempo den su añanan di desaroyo como adolescente su raiznan Colombiano. “Mi tabata tende un vallenato y mi tabata hay’e horibel.” Pero e tension tabata bin di tur dos banda, pasobra ora e tabata bay Colombia, su primonan tabata bis’e ‘ta Rubiano bo ta, bo spaño no ta bon, bo no sa nada di nos’.
Orguyo pa ambos herencia
Aunke antes e tabata sinti un berguensa pa bisa di unda e ta bin, awendia e ta hopi orguyoso pa reconoce su raiznan y tambe su identidad Arubiano hunto. E sa di su mayornan cu aunke nan nunca a bisa esaki, e echo cu e tabata rechasa su identidad Colombiano tabata haci nan duele.
E rechaso di e otro banda di su identidad cultural no solamente tabata internamente, segun sra. Malvido. “Mi tabatin amiganan Venezolano y mi ta corda con nos tabata evita di papia Spaño cu otro expres. Cual awo mi ta haya cu ta leuk pa por papia Spaño cu otro aunke ambos di nos ta papia Papiamento. Pero di tur dos banda nos tabata evit’e.”
Pero awo e ta realisa cu e no mester a evita conecta cu su propio cultura y di su raiznan.
“Mi tabata hopi orguyoso di tin nacionalidad Hulandes, pero mi no tabata realisa kico e tabata nifica. Pa mi tabata djis cu mi ta djis merece pasobra mi a nace akinan. Pero mi no tabata wak rond di mi unda asina hopi hende sin dje tabata tin e hopi duro y nan tabata bringa duro pa haya e papel ey.”
Sra. Malvido ta sinti cu aunke no tur Rubiano ta purba exclui personanan cu ‘otro sanger’, e ta haya cu ainda tin un aspecto di exclusion, maske con chikito e por ta. “Si bo bisa nan bo ta Rubiano, nan ta bisa cu no, bo no ta pasobra bo a nace aki pero bo sanger ta Colombiano. No tur Rubiano ta asina, pero tin cu ta keda laga bo sinti manera bo no ta pertenece.”
‘Xenofobia ta tur caminda pero mester bin mas positivismo’
Sinembargo, e actitud di exclusion aki el a bin ta realisa despues di tempo cu no ta na Aruba so bo ta hay’e. Ora el a bay studia na Hulanda sra. Malvido a realisa cu hopi hende Hulandes ta trata Marocano y Antiano di mesun manera cu Rubiano ta trata Latino y otro hende di afo. “E ta pasa tur caminda. Manera na Colombia mes awo e Venezolano ta un bon ehempel. Imagina bo, nan cu lo mester ta rumannan.”
Pero e ta purba educa hende unda cu e bay riba e aspecto aki, despues di haya orguyo den e manera con su mayornan a bay dilanti na Aruba. Esaki ta pasobra Aruba a duna nan un chens, pero tambe pasobra su mayornan a traha masha duro y ta contribuyendo, sra. Malvido ta conta.
“Mi ta orguyoso cu mi mayornan a bay dilanti y ora mi wak mi tata riba caya mi ta wak cu e ta orguyoso di ta Colombiano pero tambe Arubiano. Ademas mi ta sinti bon cu ora hende papia nan ta kere cu e ta Rubiano, pues e no ta pasando den discriminacion aunke antes e tabata duro, e ta mustra con leu nan a bin.”
Aunke semper ta bay tin personanan cu ta inmigra pa motibonan menos positivo, sra. Malvido kier pa no tur, no djis Rubiano pero en general ta mas consciente cu tin hende cu ta establece nan mes na un pais cu intencion positivo. “Tin hende cu ta bin aki, nan ta contribui, nan ta worry cu e comunidad y nan kier wak e bay dilanti.”
‘Rubiano discrimina na Hulanda ta keda discrimina contra Latino’
Algo cu sra. Malvido a tuma nota di dje ta cu hende di su propio generacion cu a bay studia na Hulanda y a pasa den discriminacion no ta realisa cu nan propio prohimo tabata haci esaki na Aruba.
“Mi por corda exactamente ken tabata bisa mi cu mi no ta Rubiano den scol basico y awo mi ta tende nan storianan di discriminacion na Hulanda. Pero nan no ta corda cu nan mes tabata discrimina. Y e mesun hendenan ey ta discrimina contra Venezolano. Mi ta puntra mi mes, henter e experiencia na Hulanda no a cambia bo mentalidad? Si na Aruba bo ta sinta discrimina ainda ora Hulandes a uza tur sorto di nomber pa bo, ainda tin hende cu no kier duna hende di afo un chens. Mi no ta wak cu nan ta habri nan wowo.”
Pues asina sra. Malvido ta contribui di su manera, desmintiendo cu stranheronan simplemente ta bin aki pa manda nan placa otro pais sin preocupa pa integra y contribui.
