Parlamento di Malta a aproba e acta di matrimonio y otro amiendanan cual lo posibilita matrimonio entre parehanan di mesun sexo. Malta awor lo ta e di 15 pais Europeo y e di 25 pais mundial cu lo haci e tipo di matrimonio aki posibel.
E cambionan cu a wordo haci no solamente ta consisti di aprobacion di matrimonio entre parehanan di mesun sexo, pero ta inclui amienda na e codigo criminal, codigo di organisacion civil, e codigo civil, acta di matrimonio y e acta di union civil, entre otro.
Despues di e voto, voorzitter di parlamento Carmel Cacopardo a comenta: “Nos pais a mustra madurez cu e aprobacion casi unanimo di e leynan aki. Como pais nos mester respeta cada un miembro di nos sociedad, y ta un berguensa cu tin persona cu ta wak otro cu balornan diferente na nan mes como ‘inmoral’.”
Prome minister di Malta Joseph Muscat di su parti a bisa cu e voto aki ta representa un momento historico den e historia di e pais. No obstante cu un grupo ta contra di e amienda aki, cu tempo nos lo wak cu nos a tuma e decision corecto. Muscat a agrega cu prome cu a introduci divorcio y union civil, tambe tabatin grupo cu a bay en contra di esaki, y igualmente ora a introduci matrimonio civil.
