E malesa cancer por yega sin importa si ta mucha, hoben of un adulto, cualkier persona por haya e malesa. Sinembargo tin fundacion pa cualkier persona cu pasa den e malesa aki por acerca pa informacion, guia y ayudo.
Lily Prins di Koningin Wilhelmina Kanker Funds ta bisa cu tur sorto di cancer por yega na porta di cualkier persona, sin importa nan edad. “Awendia no por bisa mas”, antes tabata mira e malesa presenta cerca persona di edad avansa.
Den caso cu e persona por ta hoben, mucho biaha nan tin berguensa of miedo di acerca un fundacion of pa bay dokter, y esaki ta pone cu e cancer por avansa y bira pio sin tratamento. Pero Prins ta bisa cu nan por yega e fundacion sin e miedo pa por haya e ayudo cu nan mester.
E fundacion ta yuda si mester manda e pashent den exterior y cu e gastonan cu esaki por trece cune, ‘ora nos bisa cu nos gasto ta halto’. Pa es motibo e fundacion ta haci actividad pa por cubri e gasto pa por keda funciona y brinda nan servicio. Prins ta bisa tambe cu e boluntarionan ta haci nan ‘bon trabou’, e enfermeronan cu ta keda wak pa pashent te na ultimo momento.
Sinembargo, Prins ta remarca cu e porcentahe di pashent cu ta bay opera afo, mayoria ta keda na bida. Mayoria cu ta sali bay exterior ta pasobra nan a opera aki na Aruba. “Nan ta yega na porta pa yudansa den nan fase terminal. Ora nan ta yega Wilhelmina ta te na final.” E ta remarca cu tin pashent cu a opera cu nan 70 aña di edad y ainda ta na bida.
Mucho biaha e pashent ta yega e fundacion ta pasobra nan kier yudansa urgente. E ta bisa cu e ta ofrece e yudansa como boluntario y di curason. “Ami ta duna servicio 24/7 tur ora na hende tin problema. Ora cu e malesa bati na bo porta bo sa kico e persona ta pasa aden”, Prins a finalisa.
