Malcontento ta reinando den Cuerpo Policial

Diahuebs mainta durante e conferencia di presa duna pa sindicato SPA, presidente di sindicato Jose Dirks a trece dilanti cu tin malcontento reinando den Cuerpo Policial. E malcontentonan aki ta basa riba, entre otro, fayo den maneho organisatorio caminda no tin claridad pa loke ta trata vacaturanan existente, un funcion adapta pa agentenan di edad avansa y control di e condicionnan di salud den e wardanan di polis.

Dirks a splica cu tin basta malcontento reinando den KPA, mirando cu tin diferente vacatura habri den Cuerpo Policial Aruba y cu te ainda no tin ningun proceso di solicitacion pa nan. Esaki ta stroba otro coleganan di crece y pesey ta pidi pa directiva splica kico ta pasando.

Tambe tin coleganan polis cu ta rabia paso tin un altocomisario berdad, pero no tin un nombramento fiho den e posicion importante aki; loke ta pone cu e organisacion ta un poco instabil dor di no sa kico por pasa of kico no por pasa. E sindicalista ta splica cu ta importante pa minister di husticia tene na cuenta e seriedad di e nombramento di un altocomisario.

Ta asina cu tin coleganan cu a solicita pa e posicion di altocomisario, pero cu nunca a haya e oportunidad pa yega na un entrevista. Aki ta caminda Dirks ta bisa cu ta un falta di respet pa e colega ey, kende a solicita y nan no a ni yama su persona pa un ‘solicitatie gesprek’ y kier un clarificacion di parti di minister di husticia.

E president di SPA tambe ta enfatisa cu tin coleganan riba 55 aña cu ta traha warda di anochi; algo cu ta inhumano. Por ehempel, un colega di 60 aña cu ta core tras di un ladron. E sindicato ta di opinion cu mester yega na un areglo social pa e coleganan aki por ‘bouw af’ despues di 55 aña di edad.

Di otro banda, tin colega cu a bira basta malo; y despues di haci control na warda di playa, nunca mas a ricibi e rapport por escrito di kico ta pasa. SPA kier haya sa for di Departamento di Salubridad Publico, kico precisamente ta pasa. Esaki ta conta, no solamente pa Warda di Playa, pero pa tur otro wardanan. Ta pidi pa haci un control na tur wardanan, pero te dia di awe, ta na warda di playa so esaki a ser haci.