Desaroyo ta tumando luga na hospital; sinembargo tin mal contento entre e trahadonan y comunidad en general pa loke ta trata e proyecto di construccion di e edificio, caminda ta mustrando varios fayo.
Gina Maduro, Presidente di sindicato ABV, a comparti cu for di comienso di e proyecto di construccion a señala diferente problema y reto cu empleado y pashent tin cu pasa aden.
Den e ultimo siman, Maduro ta splica cu tin problema sea di diesel, schimmel of cosnan cu ta lek, muraya no den bon condicion, tambe tin mancha. A menciona e problema den laboratorio unda cu tabatin consecuencia.
E departamento di emergencia a haya su mes cu tur reto, cu nan mester a instala airco mobil; tambe problema di ventilacion. E problema cu algun aparato cu tin ta blokia entrada di ambulance.
Problema cu sistema di computer, caminda nan ta bezig cu sistema digital, pero unabes e sistema bay down, nan ta wak nan mes ta bayendo bek na e sistema di skirbi tur cos na man pa despues pasa informacion ora sistema bira bon bek.
Maduro tambe a comenta tocante departamento di endoscopie, cu a wordo incorpora temporalmente den emergencia. “Den e departamento ey, cama ta limita, pues esaki ta stroba. Ta purbando di sigui duna e servicio, pero ta stroba otro departamento, pues tin cu sigui menciona.”
Den oranan di mainta tambe el a bisa cu departamento di radiologia tabata para pafo, pa motibo cu nan no por a sigui cu nan actividad pa problema di schimmel. El a bisa cu diferente promesa a wordo haci, pero no ta cumpli y esey a laga cu trahado ‘no tin confiansa den ningun hende’.
Sinembargo, Maduro ta expresa cu continuamente pueblo di Aruba ta esunnan cu ta sali perhudica, pa motibo cu ta cancela y nan tin cu traha un afspraak di nobo. “Pashent cu ta wardando 1 pa 2 luna pa cualkier test cu nan tin cu haci, pa uzo di nos servicio, pero lamentabel no por duna. No ta cu trahado no kier duna e servicio, pero situacion laboral no ta permiti pa nan haci nan trabou.”
El a informa cu sindicato a sinta diferente biaha cu stakeholders, sea minister, hefe di edificio di hospital, comision di construccion cu ta encarga cu e parti ey, ‘pero mi ta wak no tin control mas’.
Maduro ta bisa cu no tin un vision y direccion; pa es motibo ta bira fastioso como empleado di hospital pa por eherce den su trabou cu un situacion asina. Sinembargo, e ta bisa cu nan tin cu sigui cu servicio, keda motiva, pasobra nan ta trata cu pashent y bida di hende.
“Esey ta reto cu tin trahado disgusta. Hopi di nan a bandona hospital caba. Algun ta bayendo ImSan pa motibo cu eynan si nan ta cu trayecto, proyecto y departamento manera radioterapia, pues hende ta prefera bay eynan”, Maduro ta expresa.
Nan ta wak cu den hospital no ta yegando na un solucion caminda cada persona individual mester busca nan mes ‘no ta normal’. E ta bisa como nan di sindicato a señala hopi biaha, cu nan mes a mira e proyecto su fase cu a entrega, nan mes a mira tur situacion den hospital.
“Si e nobo mes ta fayando, kico lo keda pa ora e ta cla? Ora cu hospital keda cla anto mester keda renoba esunnan nobo. Nan ta bezig cu departamento nobo, creando problema, sin conta e parti bieu”, Maduro ta splica.
El a comenta cu ta sali di un problema pa crea otro. Maduro ta bisa cu SOGA ta esun cu mester encarga cu e problema, pa motibo cu hospital ta esun cu ta uza e edificio so. “Nos ta esun cu mester carga cu tur consecuencia.”
Sinembargo, contratista a cuminsa un caso conta sindicato ABV, pa motibo cu nan a duna nan opinion di e problema cu tin den e edificio y construccion. “E ta un desaster. Nan a manda nos Corte. Nos como sindicato a prolonga esaki, pa motibo cu abogado tabata riba vakantie, pero ora cu caso yega Corte, mi ta invita pueblo pa bin, pasobra ta nan tin cu paga e miyones di placa den e proyecto desastroso aki.”
