E ayudo humanitario di e-Voucher cu organisacion Cruz Cora Aruba ta otorga ta causando indignacion.

No pasobra e ayudo humanitario aki ta malo. Sino pa e mal uso y abuso y te hasta negoshi cu hendenan cu mal intencion ta bin haciendo di dje. Pero tambe e falta di un bon control pa e ayudo aki por yega na man di e hendenan cu berdaderamente tin mas necesidad.

Durante un reportahe, Bon Dia Aruba a ricibi varios reaccion di diferente persona riba e manera con algun di e hendenan beneficia di dje, ta abusa di e ayudo bon intencional aki cu Cruz Cora Aruba ta otorga cu financiamento di Hulanda via su Ministerio di Interior y Asunto di Reino. E ayudo aki a wordo introduci pa mitiga e necesidad cu e pandemia di Covid por a ocasiona den e poblacion mas vulnerabel di nos comunidad.

E-Voucher

E-Voucher ta traha manera un debit card pa medio di un sistema yama “Red Rose.” E ta un forma di ayudo cu ta wordo otorga ora cu e persona cu ta aplica p’e, ta wordo aproba pa medio di un screening realisa pa un comision. Pero tur cos ta mustra cu e control aki no ta wordo realisa debidamente. Of e tin hopi buraco den dje, pasobra tin hendenan cu a yega di pasa no un, pero varios fast ball, na e organisacion aki.

E ayudo aki ta wordo duna na e hendenan cu no tin niun tipo di entrada. Ta e hendenan mas vulnerabel cu supuestamente no tin trabao y cu no ta ricibi salario of subsidio di trabao. Tampoco pension y menos asistencia social di e departamento di Asunto Social, ya sea FASE, onderstand of bijstad.

Den e prome etapa di e programa di e-Voucher, Cruz Cora a entrega na 4.500 famia e ayudo aki. Tambe nan a reparti mas cu 51 mil cuminda cayente pa e personanan cu no por cushina. E solicitud pa e ayudo aki ta grandi. Sinembargo e pregunta cu ta keda na laira ta: Cuanto di esnan cu a of ta hayando e ayudo humanitario y bon intencional aki, berdaderamente tin mester di dje?

Hendenan sin necesidad

Cruz Cora ta un organisacion serio cu ta brinda ayudo humanitario sin haci distincion di nacionalidad, rasa of religion. E organisacion aki no ta diferencia riba kende tin mester di nan. Nan ta principionan fundamental na nivel internacional cu ta inspira e organisacion aki pa brinda su ayudo humanitario.

Sinembargo un parti di esunnan cu ta bati nan porta ta hendenan di afo cu a keda na Aruba, sin un status legal defini. E problema ta sinta cu algun di nan ora di aplica pa e ayudo no ta reporta niun entrada. Mientras cu nan ta trahando ilegalmente. Kiermen cu a pesar cu nan ta ricibi entrada pa nan trabao, toch nan ta probecha di e ayudo humanitario aki.

Mientras cu tin otronan cu por haya trabao, pero nan mes a conforma cu e ayudo humanitario aki, combina cu e ayudo financiero di FASE. Asina den e ambiente di confort aki nan no ta sinti mas e necesidad pa bay traha. “Nos ta creando un comunidad di hendenan floho, cu ora e ayudo aki caba, nan no lo kier traha mas…” asina un persona a declara na e matutino aki.

Otro persona a conta su experiencia personal ora cu el a bay haci compras den un di e supermercadonan asigna pa e sistema di e-Voucher. Na momento cu el a bay paga a topa cu un aglomeracion di hende. Un di e cahero a pone ordo, y el a bisa: “Esun cu tin ayudo di Cruz Cora mester para den rij den e cahanan number tal y tal, manera ta indica ariba e borchi.”

Mesora e por a ripara cu un gran mayoria di nan a bay para den rij den e cahanan asigna pa “paga” cu e-Voucher. Pero e persona aki a keda sorpresa ora cu e por a wak cu e hendenan aki tabatin celular costoso cu huñanan y cabey nechi drecha, cu realmente no tabata mustra cu nan tabata pasando berdaderamente den necesidad grandi. Esaki a causa hopi indignacion cerca dje.

“Ami cu mester cera e cranchi di mi gastonan di cuminda, pasobra nan a corta 40 porciento di mi salario. Mientras mi por a wak e hendenan aki cumprando na grandi. No mag!,” asina el a laga sa.

Negoshi cu e-Voucher

Tin otro cu a denuncia cu negoshi ta wordo haci cu e tipo di e-Voucher aki. Nan ta voucher cu ta entre 358 florin pa 950 florin, esaki ta depende di e cantidad di hende di cada famia cu ta aplica p’e. E ayudo aki ta destina pa cubri cuminda basico y productonan di higiena pa 1 luna.

Ta asina cu tin hendenan cu ta ‘bende’ e voucher aki. Nan sa di busca hendenan di confiansa di nan circulo, ya sea di famia of amistad, pa haci negoshi cune. Esun cu a haya e-Voucher ta bay haci compras cu lista na man den e supermercado a cambio cu despues e ta haya e placa cash. Si e compras ta sali por ehempel pa 500 florin, e ta haya 450 florin of 400 florin, pues e ta bira un ‘win-win situation.’

“Tur e abuso aki ta irita nos. Pasobra nos sa cu tin hendenan cu di berdad mester di e ayudo humanitario aki, pero nan no ta hay’e, ya sea pa orguyo. Of nan ta wordo nenga pasobra nan ta haya otro ayudo of entrada cu no ta yega na nada pa cubri nan necesidadnan,” asina un persona a declara.

E ayudo humanitario aki pronto lo conoce un final y ta depende di Hulanda si lo sigui financia Cruz Cora pa bini otro aña cune. Pero e sentimento riba e ayudo aki ta uno mixto den comunidad. Ta berdad cu tin hendenan cu mester di dje y nan ta wordo beneficia pa e ayudo aki.

Pero tin otronan cu ta abusa y saca e miho probecho di dje. Manera un hende humilde di origen Venezolano a bisa: “Pagaremos justos por pecadores…” Kiermen personanan den necesidad cu a haci tur cos bon lo paga e consecuencianan di e otronan cu a haci mal uso, abuso y negoshi cu e ayudo humanitario di e-Voucher.