Ayera mainta un awasero inespera a cay riba isla unda a afecta cierto lugar, manera hotel, unda palapanan a cay y turista a reporta esaki riba rednan social.
Awaseronan ta bin cay den dianan aki, na unda cierto caminda ta ser afecta. E biaha aki tabata na Divi & Tamarijn Aruba, unda palapanan a cay debi na olanan fuerte di lama.
Pa esaki, usuarionan riba rednan social, vooral turistanan, a reporta esaki riba gruponan pa asina mustra con e situacion tabata ayera den area aki unda no a laga dañonan hopi mas fuerte.
Recientemente tormentanan a bin creando e awaseronan aki, cu ta algo normal den temporada den cual nos ta actualmente. Ademas Meteo Aruba a ayera merdia a reporta cu tormenta Tammy a regenera y ta un tormenta tropical, e tabata situa na 350 km oost di Bermuda y tabata moviendo noordwest cu 6km pa ora.
Nan tambe a indica cu por tin potencial awasero e dia aki. Nan a sugeri na ocupantenan di boto chikito pa bay cu cautela cerca di costa na partinan zuidwest te noordwest, esaki debi na labaderanan modera, tambe a sugeri na landadonan y usuarionan di lama pa tene cuenta cu esaki.
Potretnan ta cortesia di usuarionan di Facebook.
