Ayera a inicia e campaña “New Year, New Smile” dedica na higiena y salud oral. Alina L’Isle, profesional den cuido oral, a tuma e iniciativa aki pa asina trece conscientisacion den pueblo di Aruba ariba e importancia di salud oral pa bienestar general di un persona.
L’Isle ta remarca cu salud oral ta un bista den e bienestar general. E sonrisa di un persona no ta solamente un refleho di djentenan saludabel, pero e ta un parti vital di salud y ta ofrece tambe e oportunidad pa explora e vinculo profundo entre salud oral y bienestar general.
“Un boca saludabel ta contribui na un curpa saludabel,” el a indica.
El a splica cu investigacion ta sugeri cu mal salud oral ta conecta cu diferente condicion sistematico, manera entre otro malesa di curason, diabetes y mas. Cuido di e sonrisa ta un paso proactivo pa nutri henter e curpa humano.
Ademas, un bon salud oral ta yuda reforsa inmunidad. L’Isle ta resalta cu e boca ta e entrada di e curpa y un bon higiena oral ta yuda preveni bacterianan perhudicial di drenta den e sanger, sosteniendo e sistema inmunologico den su defensa contra infeccion- y malesanan.
El a remarca cu higiena oral tambe ta contribui na bienestar mental. Un sonrisa briyante hopi biaha ta bay man den man cu confiansa y autoestima positivo. Un persona cu ta mantene un bon salud oral, el a subraya, por impacta positivamente su bienestar mental, promoviendo un bida
mas feliz y sigur di su mes.
L’Isle a enfatisa cu mester crea habitonan saludabel y priorisa e salud oral pa stimula un estilo di bida cu habitonan saludabel. For di laba regularmente te na scoge un consumo consciente di cuminda, e habitonan aki ta contribui na un bienestar general.
Cu e campaña “New Year, New Smile”, L’Isle kier conscientisa cada ciudadano pa priorisa nan salud oral den 2024. “Planifica bo bishita na bo dentista, adopta bo rutina di cuido oral, y presencia e efecto positivo cu esaki tin riba bo bienestar general. Hunto laga nos inspira un comunidad comprometi cu bienestar,” el a destaca.
