Luna pasa, Bon Dia Aruba a publica tocante e rapport di Algemene Rekenkamer Aruba (ARA), “Op afstand, maar toch dichtbij”, enfoca riba instancianan cu ta poni na un distancia di pais Aruba. E rapport aki a investiga e periodo financiero di 2018 pa 2020 y bay mas profundo den seis instancia. Den e rapport, ARA a remarca cu e hecho cu ta pone instancianan na un distancia no por nifica cu nan ta for di bista of ta liber di duna cuenta y tampoco por ta asina cu esakinan ta trece gastonan adicional hopi halto pa Pais Aruba pa motibo cu ta crea areglonan sin duracion of costo defini pa por eherce tareanan publico.
Esaki ta keda ilustra den e caso di dos compania: Arubus, Serlimar y Post Aruba.
Luna pasa tambe a anuncia cu director di Arubus, Edwin Mohamed, ta retira for di su posicion inmediatamente. Contestando pregunta di Bon Dia Aruba e tempo aya, minister di Transporte, Ursell Arends Arends a splica cu e situacion financiero di Arubus ta critico cual a ser confirma pa varios instancia profesional y imparcial. Instancianan aki ta Algemene Rekenkamer, CAft y Price Waterhouse Cooper. El a señala cu e punto di salida di Gobierno ta cu Arubus no por sigui depende solamente riba fondonan publico y cu e instancia mester expande su servicionan comercial tambe, na mes manera cu tur otro NV.
E rapport di ARA ta confirma cu Arubus ta den un situacion financiero fragil y ta dependiente di contribucion adicional di pais Aruba ya pa hopi aña. Asina ta surgi e pregunta: pakico no tabatin un intervencion mas trempan?
E mesun rapport di ARA ta señala e problemanan cu Post Aruba. Pais Aruba ta 100% shareholder di Post Aruba desde su privatisacion, cu minister di Economia, Comunicacion y Desaroyo Sostenible, Geoffrey Wever representando Pais Aruba den reunion general di shareholders. ARA ta destaca con e continuidad di Post Aruba ta dependiente di e transferencianan di capital di Pais Aruba, cu pa final di 2020 tabata suma Afl. 34.1 miyon. Pero pa motibo di e manera con e compania ta set up, Post Aruba ta sufri perdidanan grandi ya durante hopi aña. Ta notabel tambe cu un responsabilidad pa e entrega di e rapport anual y cuenta anual, ta ser poni riba e minister encarga cu e asunto postal. Entrega di cuenta anual di Post Aruba no a mantene su obligacion di contabilidad pa e aña 2018 te cu 2020. Atrobe ta bin e pregunta, pakico a laga e compania aki keda añas den perdida y un situacion financiero dificil, sin interveni?
Y e situacion di Serlimar tambe ta conoci, cu pa hopi tempo tabata den bancarota y cu problemanan enorme. E rapport di ARA tambe ta dedica atencion na e compania aki. E minister di Naturalesa ta e minister di politica pa Serlimar, pero segun ARA, e Landsverordening di Serlimar no ta duna claridad suficiente tocante e rol y tarea di e director, e minister y e RvT. Esaki por resulta den e practica di desorientacion di rol of falta di claridad tocante diferencia di vision. Serlimar ta un institucion cu ta funciona na distancia, cu den principio tin cu genera su propio ingreso y mester ta responsable pa su propio operacion. Esaki no ta logra, den parti pa motibo di decision politico y gasto di personal demasiado halto relaciona cu ingreso. Den conclusion, e realidad y e modelo scogi no ta consisti cu otro. Bao di e minister actual, Serlimar a sali di su suspension di pago na 28 di Augustus 2023 despues di tres aña, y a preveni cu Serlimar bay den bancarota. Sinembargo, den e caso aki tambe ta papia di añas di mal maneho cu a laga e compania den un situacion precario.
E casonan aki ta ilustra e manera con gobierno di Aruba, di forma structural, ta neglisha e companianan estatal. Maske e companianan tin obligacion di duna cuenta na e ministernan, ta parce como cu e ministernan no ta pone atencion of tuma accion te ora cu ta demasiado laat y e situacion di e companianan ta deplorable. Pakico esaki ta asina? Pakico no ta interveni mas trempan?
Bon Dia Aruba a manda pregunta pa prome minister, Evelyn Wever-Croes, den su rol como lider di gobierno. Bon Dia Aruba a puntra con e control di e NVnan di gobierno ta? E ministernan no ta tene un bista riba e compania prome cu ta mucho laat y ya el a bay bancarota? Ken ta controla e directornan di e companianan aki? Ki mecanismo tin pa sigura cu nan ta bon maneha?
Lamentablemente, te ciere di redaccion no a ricibi un contesta.
